Дьокуускайга сонун экспедицияны кытта көрсүһүү буолла

Балаҕан ыйын 13 күнүгэр Дьокуускай куоракка «Байкал-Аляска: путь сибирских купцов» экспедиция бырайыагын ааптара уонна капитана Анатолий Казакевичтыын уонна экспедиция чилиэннэрэ Виктория   Волковалыын, Артем Богославскайдыын көрсүһүү буолла. Ол туһунан Уокуруктааҕы дьаһалта пресс-сулууспата иһитиннэрдэ. 
Кэлбит ыалдьыттар суруналыыстарга Байкал-Аляска бырайыак презентациятын, «Байкал-Аляска: от Иркутска до Шантарских островов по пути первопроходцев» айан каартатын көрдөрдүлэр. 
Анатолий Казакевич иһитиннэрбитинэн, экспедиция бастакы сири арыйааччылар ааспыт территорияларыгар билигин хайдах олороллорун көрөр баҕаттан, историктарга анаан матырыйаал хомуйар сыалтан саҕаламмыт уонна улахан бырайыак буола үүммүт, сүүһүнэн дьону түмпүт. 
«Иркутскайтан сылдьар предпринимательбын. 2007 сылтан мин хампаанньам Байкалга туризмы сайыннарыынан дьарыктанар. Мин 2013 сылга  Иркутскай губерния историятын сэдэх матырыйаалларын кытта билсибитим.   Онно икки үйэ анараа өттүгэр Сибиир предпринимателлэрин бырайыактара Енисейтэн Аляскаҕа диэри киэҥ сири хабан олорбуттарын билбитим. 800 атыыһыт Иркутскайга мустан, Иркутскайтан Аляскаҕа диэри атыы суолун арыйан Арассыыйа-Америка хампаанньатын тэрийбиттэр, онтулара ол саҕана аан дойдуга баар бөдөҥ атыы хампаанньаларыттан биирдэстэринэн буолбут», – диэн кэпсээбит экспедиция салайааччыта. 
Анатолий Казакевич хамаандата 150 сыл буолан баран атыыһыттар баарыстаах катамарынан айаннарын хатылаабыттар. Нуучча географическай обществотын өйөбүлүнэн «Байкал-Аляска: путь сибирских купцов» экспедиция Иркутскайтан Ситкаҕа диэри 15 000 км сири барбыттар. 
Экспедиция салайааччыта этэринэн, билигин Иркутскай губерния историятын, атыыһыттар тэрийбит экспедицияларын туһунан дааннайдары чөлүгэр түһэриигэ үлэ барар.  Ол курдук, Арассыыйа-Америка хампаанньатын урукку дьиэтигэр Нуучча Америкатын музейын тэрийии, сибиир атыыһыттарын скверин, паарка-отели оҥоруу былааннанар. 
Инники өттүгэр ити сэдэх айан суола туризм сайдар хайысхатанынан буолуон сөп диэн этилиннэ. Билигин экспедиция туристарга кэрэхсэбиллээх буолар матырыйааллары хомуйар. Экспедиция кыттыылааҕа,  «Байкал-Аляска” документальнай киинэ режиссера Артем Богославскай иһитиннэрбитинэн, Арассыыйа илиҥҥи өттүн туһунан документальнай киинэ уһуллар, итин сэргэ кинигэ тахсыбыт эбит.
Пресс-конференцияҕа СӨ предпринимательствоҕа, атыыга-эргиэҥҥэ уонна туризмҥа миниистирин бастакы солбуйааччы Максим Карбушев кытынна. 
«Экспедиция кыттыылаахтара айанньыттарга сэдэх сирдьити уонна айан суолун оҥорбуттар, Иркутскай уобалаһыттан Уһук Илиҥҥэ диэри Арассыыйа сэттэ регионнарыгар айаны тэрийэргэ көмөлөспүттэр», – диэн бэлиэтээтэ миниистир солбуйааччыта.
Бырайыак сэттэ сылын тухары сэттэ илиҥҥи регионнарынан – Иркутскай уобалаһынан, Бурятиянан, Саха сиринэн, Хабаровскай кыраайынан, Магаданскай уобалаһынан, Камчатканан уонна Чукотканан сылдьыбыттар.