Дьокуускайга саҥа 9 №-дээх ДЮСШ баар буолла!

Бүгүн, Арассыыйа күнүгэр, Дьокуускайга өссө биир сабыс-саҥа спорт комплекса үлэҕэ киирдэ, ону кытта тохсус ДЮСШ баар буолла.
Ильменскэй уулусса, 27 аадырыска тутуллубут саҥа спорт комплекса «Демография» национальнай бырайыак «Спорт – норма жизни» бырагырааматынан баара-суоҕа 10 ый иһигэр олоххо киирдэ. Комплекс маҥнайгы этээһигэр – волейболлуур саала, иккискэ бокса, тренажёрдар саалалара, медкабинет, тренердэр хосторо бааллар. Манна VIII-с «Азия оҕолоро» волейболга күрэхтэһиилэрэ буолуоҕа.

«Азия оҕолорун» кэнниттэн манна тустуу, гимнастика, бокса, пауэрлифтинг, волейбол дьарыктара ыытыллыаҕа. Ону сэргэ сахалыы остуол оонньууларыгар дьарыктаныахха сөп буолуоҕа.
Эбийиэги үөрүүлээхтик арыйыыга бүгүн куорат баһылыга Евгений Григорьев саҥа тутуу куорат тохсус оҕо спордун оскуолата уонна уус-уран гимнастиканан дьарыктанааччылар бастакы ДЮСШлара буоларын тоһоҕолоото. «Биһиги куораппытыгар бу тохсус ДЮСШ уонна бастакы уус-уран гимнастика ДЮСШта баар буолла. Бүгүҥҥү күҥҥэ Дьокуускайга 1000 кэриҥэ кыыс уус-уран гимнастиканан дьарыктанар, кыргыттар мантан ыла бары ирдэбилгэ эппиэттиир бэйэлэрэ туһунан саалалаах буолуохтара. Дойду баһылыга Владимир Путин өйөбүлүн ылбыт маастар-былаанынан 2030 сылга диэри биһиги куорат атын оройуоннарыгар өссө 7 спорт эбийиэгин тутуохпут»,– диэн бэлиэтээтэ Евгений Григьорьев уонна тутааччыларга – муниципальнай сакаасчыт «Главстрой» МХТ уонна бэдэрээтчит «Монтажник» ПК – махталын биллэрдэ.