Дьокуускайга — үрдүк аат

Сэтинньи 15 күнүгэр дойду тэбэр сүрэҕиттэн үөрүүлээх сонуну иһиттибит. Ол курдук, Арассыыйа Бэрэсидьиэнэ Владимир Путин ыйааҕынан Дьокуускай куоракка “Килбиэннээх үлэ куората” үрдүк аат иҥэрилиннэ.

Баһылык Евгений Григорьев үрдүк наҕарааданы ылыы Саха АССР төрүттэммитэ 100, киин куорат 390 сыллаах үбүлүөйдэригэр ордук  долгутуулааҕын бэлиэтээтэ. 
“Бастатан туран, биһиги бэтэрээннэрбитигэр, Аҕа дойду Улуу сэриитин кыттыылаахтарыгар, тыыл бэтэрээннэригэр, сэрии кэмин оҕолоругар махталбын тиэрдиэхпин баҕарабын. Үлэҕэ хорсун быһыыгыт, эйэлээх халлааммыт иһин эһиэхэ сүгүрүйэбит! Бу үрдүк наҕараада – Ийэ дойдубутун фроҥҥа көмүскээбит, тыылга кыайыыны уһансыбыт хастыы эмэ уонунан тыһыынча куорат олохтооҕун сүҥкэн кылаатын туоһута!” – диэн Евгений Николаевич бэйэтин ханаалыгар суруйда. 
Итини сэргэ, куорат баһылыга нэһилиэнньэ аатыттан уопсастыбанньыктарга, Ил Дархан Айсен Сергеевич Николаевка истиҥ махталын тиэртэ.