Нэдиэлэ устата 2 тыһыынча куб.м тахса чалбах хачайданна

Бу күннэргэ киин куорат хомунаалынай сулууспалара күүһүрдүллүбүт эрэсииминэн суол намыһах сирдэриттэн уонна аттынааҕы территориялартан ууну хачайдыыллар.

«Жилкомсервис» МУТ иһитиннэрбитинэн, атырдьах ыйын 25 күнүгэр куорат уулуссаларыгар күнүскү симиэнэҕэ муниципальнай тэрилтэ 6 тиэхиньикэтэ тахсыбыт. Бу күн сарсыарда 11 чаастааҕы туругунан ассенизаторскай массыыналар 310 куб. миэтэрэ чалбаҕы оборторбуттар. Ууну хачайдааһын Ленин проспегар, Лермонтов, Хабаров, Горькай, Богдан Чижик, Ярославскай, Ойуунускай, Каландаришвили, Челюскин, Очиченко, Бабушкин уонна Ильменьскай уулуссаларга ыытыллар.

«Атырдьах ыйын 16-24 күннэригэр тэрилтэбит үлэһиттэрэ барыта 2189 куб. миэтэрэ ардах уутун күнүстэри-түүннэри хачайдаатылар. Бүгүн түүҥҥү симиэнэҕэ чалбахтары хачайдыырга 6 ассенизаторскай массыына тахсыаҕа», – диэтэ «Жилкомсервис» МУТ эксплуатационнай салаатын начаалынньыга Наталья Брылева.

«Якутдорстрой» АУо иһитиннэрбитинэн, намыһах сирдэртэн ууну хачайдааһыҥҥа 6 АСМ массыына үлэлиир. Хачайдааһын Дзержинскэй, Якутскай, Богдан Чижик, Кальвица, Октябрьскай, Ойуунускай, Тимирязев, Очиченко, Чехов, Каландаришвили, Лонгинов уулуссаларыгар ыытыллар.