Дьокуускайга М.Е. Николаев пааматынньыга туруоруллуоҕа

«Михаил Ефимович личность быһыытынан таһыма баараҕай. Бастакы бэрэсидьиэн Саха сирин уонна Арассыыйа Федерациятын судаарыстыбаннаһын уонна социальнай-экономическэй сайдыытын түстүүр конституцияларыгар киллэрбит кылаата сүҥкэн. Ыйаах кини нэһилиэстибэтин кэлэр көлүөнэлэргэ анаан үйэтитэргэ төһүү күүһүнэн буолуоҕа», – диэтэ Айсен Николаев.

Ыйаахха олоҕуран, Бастакы бэрэсидьиэни чиэстээн, «Во славу и пользу Республики» бочуоттаах бэлиэ олохтонно.

Ыйаахха чэрчитинэн элбэх тэрээһин ыытыллар, ол иһигэр Дьокуускай Киин уокуругар  М.Е. Николаев пааматынньыга туруоруллуоҕа, оттон дойдутугар, Өктөмҥө – өйдөбүнньүк комплекса тутуллуоҕа. Итиэннэ, Михаил Николаевы чиэстээн, «Во славу и пользу Республики» бочуоттаах бэлиэ олохтонно.

Сылын аайы балаҕан ыйын 27 күнүгэр, Саха сирин судаарыстыбаннаһын күнүгэр, Хаҥалас улууһун Өктөм нэһилиэгэр үөрүүлээх тэрээһин ыытыллар буолуоҕа.

Хаҥалас улууһугар научнай чинчийиилэри, аныгы технологиялары бэрэбиэркэлээһини ыытарга «Ленский край» научнай-технологическэй кластер оҥоһуллара былааннанар.

Подмосковьеҕа баар «Бэс Чагда» санаторийга М.Е. Николаев аата иҥэриллиннэ, РФ бэрэсидьиэнин иһинэн үлэлиир СӨ бэрэстэбиитэлистибэтигэр Бастакы бэрэсидьиэн аатынан саала аһыллыаҕа.

«Знанием победишь» М.Е. Николаев үөрэнээччилэргэ, устудьуоннарга, педагогтарга, култуура уонна искусство деятеллэригэр анаммыт стипендиятэ судаарыстыбаннай статустанна. Стипендияны сылын аайы, сэтинньи 13 күнүгэр, үөрүүлээх быһыыга-майгыга туттарыахтара.

«Азия оҕолоро» Норуоттар икки ардыларынааҕы оонньуулар саамай кыра саастаах кыттааччытыгар анаан Бастакы бэрэсидьиэн Кубога олохтонно.

М.Е. Николаев туһунан киинэ уһуллуоҕа, «Время Николаева», «Я вечно буду благодарен своему народу», «Избранные труды Первого Президента Республики Саха (Якутия) Михаила Ефимовича Николаева», «Продолжение эпоса» кинигэлэр тахсыахтара. Олохтоох дьаһалтаҕа киин куорат Автодорожнай уулуссатын М.Е. Николаев аатынан проспект оҥорорго сүбэлэннэ.