Дьокуускайга куорат Дууматын 29-с уочараттаах сессията буолла

Бэс ыйын 16 күнүгэр уокуруктааҕы дьаһалтаҕа Дьокуускай куораттааҕы Дуума 29-с уочараттаах сессията буолан ааста. 
Сессия үлэтигэр куорат баһылыга Евгений Григорьев, баһылык солбуйааччылара, уокуруктааҕы дьаһалта структурнай салааларын салайааччылара кытыннылар. 
Депутаттар куорат бүдьдьүөтүгэр уларыйыылары киллэриини, бүдьдьүөт туолуутун отчуотун, Суол пуондатын тэрийиини, сири туһаныыны уонна тутууну, муниципальнай баайы-дуолу салайыыны уонна арендаҕа биэриини, олохтоох салайыныы үлэһиттэрин хамнастарын, уһулуччу өҥө бэлиэлэринэн наҕараадалааһыны уо.о.д.а. боппуруостары көрдүлэр. 
Бастакы боппуруоһунан депутаттар ««Дьокуускай куорат» куораттааҕы  уокурук 2021 сылга уонна былааннаммыт 2022-2023 сылларга куорат бүдьдьүөтүн туһунан» Дьокуускай куорат Дууматын 2020 сыл ахсынньы 23 күнүнээҕи быһаарыытыгар уларытыылары киллэриини бигэргэттилэр. Уокуруктааҕы дьаһалта үпкэ Департаменын начаалынньыга Ольга Максимова бэлиэтээбитинэн, быһаарыы бырайыага судаарыстыбаннай бүдьдьүөттэн киирбити чуолкайдааһыны кытта сибээстээх. 2021 сылга уопсай дохуот 474 млн солк. эбиллибит уонна 19,4 млрд солк. тэҥнэспит, ороскуот 20,2 млрд. солк., дефицит 780 млн. буолбут. Үөрэҕириини сайыннарыыга, сылаас тохтобулларга, Марха микрооройуонун гаазтааһыҥҥа, биэрэги бөҕөргөтөр үлэҕэ уо.д.а. ороскуот үрдээбит. Куорат историятыгар бу саамай улахан бүдьдьүөт буолар диэн бэлиэтэммит. 

Иккис боппуруоһунан куорат бүдьдьүөтүн туолуутун отчуотун бигэргэтии буолла. Уокуруктааҕы дьаһалта үпкэ Департаменын начаалынньыга Ольга Максимова  дохуот 18,5 млрд солк., оттон ороскуот 18,9 млрд солк., ол эбэтэр ороскуот дохуоттааҕар элбэҕин туһунан эппит. Депутаттар отчуот хаачыстыбалаахтык бэлэмнэммитин бэлиэтээбиттэр уонна биир санаанан бигэргэппиттэр.  
Депутаттар 2013 сыл ахсынньы 25 күнүнээҕи 169-НПА № -дээх «Куораттааҕы уокурукка сири туһаныы уонна тутуулар быраабылалара» нормативнай-правовой акт уларыйыыларын ырытыстылар. Кинилэр элбэх квартиралаах дьиэлэр тиэргэннэрин иэнэ кыччаан массыыналары парковкалыырга уустугун болҕомтоҕо ыллылар. Итини кытта куорат баһылыга Евгений Григорьев сөбүлэспит уонна итинник кыһалҕа социальнай эбийиэктэргэ – оскуолаларга уонна уһуйааннарга эмиэ сытыытык турарын бэлиэтээбит. 
Сессияҕа этиллибитинэн, «Воинская часть» кыбартаал уулуссаларыгар летчица Вера Захарова, учуонай Юрий Шафер, полковник, авиатор, өрөспүүбүлүкэ бастакы комиссара  Иван Федоров уонна Саха сириттэн бастакы генерал – Котельников ааттарын  иҥэриэхтэрэ. 
Итини сэргэ, куораттааҕы Дуума уочараттаах 29-с сессиятыгар наҕараадалааһын боппуруостарын көрдүлэр.