Дьокуускайга коронавирус дьаҥынан ыалдьыбыт дьоҥҥо стационар аһылынна

Ол туһунан өрөспүүбүлүкэтээҕи суһал штаб салайааччытын солбуйааччы Ольга Балабкина бүгүҥҥү брифиҥҥэ иһитиннэрдэ. Бу коронавирус дьаҥынан ыалдьыбыт дьон ахсаана эбиллэ турарын кытта сибээстээх. 
Маны сэргэ Мэҥэ Хаҥалас улууһугар ыалдьыбыт дьон ахсаана эбиллэн, куойка ахсаанын элбэппиттэрэ этилиннэ. Бүгүҥҥү туругунан улууска ыалдьыбыт киһи ахсаана 29 тиийбит (бэҕэһээ – 13).  
Ольга Балабкина эппитинэн, Мэҥэ Хаҥалас улууһугар бүтүн ыалынан, дьиэ кэргэнинэн ыалдьыбыттар. Методическай уонна тэрийэр көмөнү оҥороору улууска үлэ уонна социальнай сайдыы, доруобуйа харыстабылын министиэристибэлэриттэн уонна өрөспүүбүлүкэ бырабыыталыстыбатыттан бөлөхтөр тиийбиттэр. Маны сэргэ Амма, Бүлүү улуустара ураты хонтуруолга ылылыннылар. 
Өрөспүүбүлүкэтээҕи клиническэй балыыһаҕа Кэбээйи, Орто Халыма улуустарыттан ыарахан форманан ыалдьыбыт дьон киирбитин туһунан Ольга Балабкина эбэн эттэ. 
Онон орто, орто анал үөрэх кыһаларын устудьуоннарын дистанционнай үөрэтиигэ көһөрүү туһунан кэпсэтии бара турарын Ольга Балабкина тоһоҕолоон эттэ. Ити миэрэ өрөспүүбүлүкэ тас өттүгэр үрдүк үөрэх кыһаларыгар үөрэнэр устудьуоннарга эмиэ булгуччу наадалаах. 
«Респираторнай ыарыыга ыалдьыбыт сибики баар буолла даҕаны, булгуччу доруобуйа харыстабылын тэрилтэлэригэр, колл-кииннэргэ биллэрэн быраастары ыҥырыҥ, ыарыыгытын баалатымаҥ», — диэн түмүктээтэ вице-премьер.