Дьокуускайга кириэһилэ-кэлээскэни, ходуноктары, баттык мастары босхо уларсыахха сөп

Пууҥҥа тэрил 17 көрүҥэ баар. Ордук наадалаахтарынан адаптационнай ороннор, кириэһилэ-кэлээскэлэр, баттык мастар, ходуноктар, кириэһилэ-туалеттар ааттаннылар.

Гражданнар маннык категориялара бу социальнай өҥөнөн  туһанар кыахтаах:

— бэйэлэрин кыайан көрүммэт буолбут аҕам саастаах гражданнар, доруобуйаларын туругунан хааччахтаах дьон;

— инбэлииттэр (ол иһигэр инбэлиит – оҕолор);

— үлэлиир кыахтаах, ол эрэн ыалдьан бэйэлэрин кыайан көрүммэт буолбут гражданнар.

Ханнык докумуон ирдэнэрий?

— клиент эбэтэр сокуоннай бэрэстэбиитэлин суругунан сайабылыанньата.

— РФ гражданинын пааспара эбэтэр кылгас болдьохтоох дастабырыанньата.

- СНИЛС.

Уларсыы усулуобуйата:

Техническэй тэрили уларсыы туһунан дуогабар түһэрсиллэр. Дуогабар болдьоҕо бүттэҕинэ тэрили төттөрү төннөрүллэр. Дуогабар 3 ыйтан ордук болдьоххо түһэрсиллибэт.

Тэрил, инбэлиити чөлүгэр түһэрии тус бырагырааматыгар олоҕуран, 3 ыйга диэри болдьохтоон босхо уларсыллар.

Сыл саҥатыттан барыта 160 итинник тэрил бэрилиннэ.

Сиһилии информацияны 40-21-78 төлөпүөнүнэн билсиэххэ сөп. Аадырыһа: Дьокуускай к., Пушкин уул., 31.