Дьокуускайга Евразия олохтоох уонна региональнай былаастарын VIII Конгреһа ыытыллыаҕа

Бэс ыйын 24-26 күннэригэр ыытыллар Конгресс олохтоох уонна региональнай былаастар бэрэстэбиитэллэрин, аан дойдутааҕы бөдөҥ тэрилтэлэр уонна олохтоох бэйэни салайыныы ассоциациятын салайааччыларын, бизнес бэрэстэбиитэллэрин уонна гражданскай сообщество чилиэннэрин түмүөҕэ.  
Тэрийээччилэринэн «Объединенные Города и Местные Власти» (ОГМВ) Евразийскай региональнай салаата, СӨ Бырабыыталыстыбата уонна  «Дьокуускай куорат» куораттааҕы уокурук буолаллар. 
Сүрүн тэрээһиннэр «Здоровый диалог ради устойчивого развития» диэн луозунунан дистанционнай көрүҥүнэн – видеоконференция быһыытынан ыытыллыахтара.  
Конгресс кыттыылаахтара сүнньүнэн доруобуйа уонна доруобуйа харыстабылын систиэмэтин, килиимэт уларыйыытын кытта охсуһуу, култуурунай нэһилиэстибэни харыстааһын тула кэпсэтэллэрэ, уопут атастаһаллара былааннанар. Кыттааччыларынан кыраныысса таһынааҕы уонна ОГМВ аан дойдутааҕы секретариатын арассыыйатааҕы экспертэрэ, СНГ-тан, Ирантан уонна Арассыыйа регионнарыттан буолуохтара. 
Дьокуускай ООН-Хабитат бырагыраама олоххо тулуурдаах буолууну сайыннарыыга пилотнай куоратынан буолар. ОГМВ Аан дойдутааҕы тэрилтэ бэрэстэбиитэллэрэ уонна ООН-Хабитат конгресс кыттыылаахтарын Дьокуускай уопутун кытта билиһиннэриэхтэрэ. 
Биир кэрэхсэбиллээх тэрэһиининэн «Культурное наследие городов Евразии» диэн виртуальнай быыстапка буолуоҕа, онно муниципалитеттар бэйэлэрин баай култуураларын уонна уратыларын көрдөрүөхтэрэ. 
Конгресс сүрүн тэрээһининэн ОГМВ Евразийскай салаатын Генеральнай ассамблеята буолуоҕа.  Ассамблея бэбиэскэтигэр – үлэ түмүктэрин ырытыы, сүрүн бырагыраамалары уонна тэрээһиннэри торумнааһын, 2021-2024 сылларга салайар састаабы талыы бааллар.
Итини сэргэ олохтоох бэйэни салайыныы ассоциацияларын тэрийии туһунан дискуссиялар, Евразия куораттарын бииргэ үлэлээһиннэрин кэҥэтэр кэпсэтиилэр барыахтара.  Конгресс Саха АССР төрүттэммитэ 100 сылын бэлиэтиир бэлэмнэнии үлэ былааныгар киирэн сылдьар.