Дьокуускайга аһымал кэнсиэр ыытылынна

Арассыыйатааҕы Волонтер күнүгэр, Арассыыйа норуоттарын култуурунай нэһилиэстибэлэрин сылыгар, Саха АССР  100 уонна Саха Өрөспүүбүлүкэтигэр Ийэ сылларыгар анаммыт «Ийэ сирим алгыhа» – «Молоды душой» регионнааҕы «үрүҥ көмүс» волонтерство киинин аһымал кэнсиэрэ.  Кэнсиэри Уус Алдан, Үөһээ Бүлүү, Бүлүү, Абый уо.д.а. улуустар баҕа өттүнэн үлэлиир уопсастыбаннай тэрилтэлэрэ тэрийдилэр.

Тэрээһиҥҥэ Ытык Сүбэ чилиэнэ У.А. Винокурова, СӨ Уопсастыбаннай палаататын чилиэнэ,  Култуура уонна искусство Арктическай судаарыстыбаннай институтун бастакы проректора С.С. Иванов, Дьокуускай куоракка Ньурба улууһун бэрэстэбиитэлэ П.Е. Чымыров эҕэрдэ тылы эттилэр. Волонтер күнүнэн «Молоды душой» федеральнай бырагыраама салайааччыта Ю.С. Мальцева видеонан эҕэрдэтин тириэртэ.

Регионнааҕы «үрүҥ көмүс» волонтерство хамсааһын көхтөөхтөрүн наҕараадалааһын буолла: кинилэргэ СӨ Ил Түмэн Судаарыстыбаннай мунньаҕын бэрэссэдээтэлин солбуйааччытын, итиэннэ СӨ ыччат дьыалаларыгар уонна социальнай коммуникацияларга миниистирин махтал суруктарын, Үөһээ Бүлүү улууһун Култуураҕа уонна духуобунай сайдыыга департаменын, СӨ Уопсастыбаннай палаататын бочуоттаах грамоталарын, итини сэргэ «Саха АССР  100 сыла»  үбүлүөйдээх бэлиэни туттардылар.

Дьон болҕомтотун «Ее Величество Женщина» уонна баҕа өттүнэн үлэлээччилэр бырайыактарын быыстапкалара, остуол оонньууларыгар маастар-кылаас ыллылар, «үрүҥ көмүс» волонтердары кытта оһуохай түһүлгэтэ төрүттэннэ.

Тэрээһинтэн киирбит үп, Саха сириттэн мобилизацияламмыт гражданнары өйөөн, «Кыайыы» пуондаҕа бэрилиннэ.