Дьокуускайга 58 лааҕыр үлэлиирэ былааннанар

Эпидемиологическай быһыы-майгы этэҥҥэ буоллаҕына, быйыл сайын  Дьокуускай куоракка 58 сынньалаҥ уонна чэбдигирдии лааҕыра 6 826 оҕону хабан үлэлиэҕэ.
Бу туһунан куорат баһылыгын солбуйааччы Наталья Степанова бэрэссэдээтэллээх анал хамыыһыйа бастакы мунньаҕар этилиннэ.  Сүрүн ирдэбил – сынньалаҥ тэрилтэтэ 75 % туолуохтаах. 
Үөрэх управлениета иһитиннэрбитинэн, оҕо сынньалаҥын уонна чэбдигирдиитин тэрилтэлэрэ муниципальнай бырагырааманан уонна өрөспүүбүлүкэ бүддьүөтүттэн үбүлэнэллэр. Быйылгы сылга чэбдигирдэр лааҕырдар материальнай-техническэй баазаларын бөҕөргөтүүгэ 1 мөлүйүөн солкуобай көрүллүөҕэ, сырдатыыга 684 тыһыынча солкуобайтан тахса суума тыырыллыаҕа, видеокамералары туруорууга 875 тыһыынча солкуобайтан тахса үп туттуллуоҕа.  
Маны таһынан араас бырайыактары олоххо киллэриигэ муниципальнай бырагырааматтан үп көрүллүөҕэ. Үөрэх министиэристибэтигэр «Радуга», «Спутник» уонна «Каландаришвили» лааҕырдар материальнай-техническэй баазаларын бөҕөргөтүүгэ өрөспүүбүлүкэ бүддьүөтүттэн субсидияҕа сайаапка түһэрилиннэ.