Дьокуускай Улуу Кыайыы 80 сылыгар бэлэмнэнэр

Киин куорат баһылыга Евгений Григорьев Улуу Кыайыы 80 сыллаах үбүлүөйүн тэрийэр кэмитиэт мунньаҕын иилээн-саҕалаан ыытта. Бу күн Олохтоох дьаһалта туһааннаах салаалара бэлэмнэнии үлэтэ хайдах баран иһэрин отчуоттаатылар.

«Куорат хаһаайыстыбатын үлэлэтэр сулууспа» муниципальнай хааһына тэрилтэтин салайааччыта Владимир Аммосов Кыайыы пааркатыгар, Кыайыы болуоссатыгар, «Ильмень күөл үрдүнэн туруйалар» сквергэ, Юрий Гагарин, Валерий Чкалов, Николай Кондаков ааттарынан сквердэргэ, Клавдий Краснояров уонна Владимир Лонгинов бүүс-пааматынньыктарыгар уонна Аҕа дойду Улуу сэриитин Дьоруойдарын уонна кыттыылаахтарын ааттарынан уулуссаларга бэлэмнэнии хаамыытын иһитиннэрдэ. Ол курдук, сэрии бэтэрээннэрэ олорбут уонна олорор дьиэлэригэр турар мемориальнай дуоскаларга көҕөрдүүгэ улахан болҕомто ууруллуоҕа.

Куораттааҕы култуура уонна духуобунай сайдыы управлениетын начаалынньыгын солбуйааччы Юлия Лазарева Улуу Кыайыы 80 сыллаах үбүлүөйүгэр ханнык култуурунай-маассабай тэрээһиннэр ыытыллалларын кэпсээтэ. Ол курдук, Кыайыы знамятын өрө көтөҕүү үөрүүлээх сиэрэ-туома, пааматынньыктарга сибэкки дьөрбөтүн ууруу, сэрии уонна тыыл бэтэрээннэрин кытта көрсүһүүлэр, миитиннэр, «Тиэргэнинэн ыллыыбыт», «Кыайыы түннүктэрэ», «Кыайыы вальса» аахсыйалар уо.д.а. үгэс буолбут тэрээһиннэр былааҥҥа киирбиттэр. Быыстапкалары, айар кэнсиэртэри киллэрэн туран, барыта 90 тэрээһин буолбут. Манна даҕатан эттэххэ, Үөрэх управлениета Кыайыы үбүлүөйүн көрсө үгүс тэрээһини ыытыаҕа – кылаас чаастарын, спортивнай күрэхтэһиилэри. 

Физическэй култуура уонна спорт управлениетын начаалынньыга Эдуард Ефимов иһитиннэрбитинэн, үбүлүөйдээх даатаҕа аналлаах спортивнай тэрээһиннэри таһынан, ыам ыйын 9 күнүгэр «Якутия» хаһыат бирииһигэр чэпчэки атлетикаҕа эстафетаны ыытар үгэс сөргүтүллүөҕэ.

Мунньах кэмигэр тэрийэр кэмитиэт кыттыылаахтара култуурунай-маассабай, үөрэх уонна атын бырааһынньыктааҕы тэрээһиннэр бырагыраамаларыгар бэйэлэрин этиилэрин киллэрдилэр.  

Түмүккэ Евгений Григорьев салайааччылар бэлэмнэнии үлэтин ураты хонтуруолга ылалларыгар, үлэ, ыйыллыбыт былаантан хаалбакка, хаачыстыбалаахтык толорулларыгар соруйда.