Дьокуускай - "Тотальнай диктант" киинэ буолуоҕа

“Тотальнай диктант-2021” ыытыллар киин куоратынан Дьокуускай буолуоҕа. Быйылгы диктант тиэкиһин ааптара – Дмитрий Глуховскай. “Суруйааччы Дьокуускайга муус устар 10 күнүгэр кэлиэҕэ, диктант ыытыллар балаһааккаларыттан биирдэстэригэр бэйэтин тиэкиһин ааҕыаҕа”, - диэн ХИФУ-ка иһитиннэрэллэр.

Арассыыйа дьоно барыта кыттар диктаныгар Дьокуускайы киин куорат оҥорор туһунан сайаапканы ХИФУ филологическай факультета түһэрбитэ.

“Тотальнай диктант” – сыллата ыытыллар ааксыйа. Сааһыттан, социальнай балаһыанньатытан тутулуга суох, ким баҕалаах кыттар. Урукку сылларга тиэкис ааптардарынан Борис Стругацкай, Дмитрий Быков, Захар Прилепин, Дина Рубина, Алексей Иванов, Евгений Водолазкин, Андрей Усачев, Леонид Юзефович  уо.д.а литератордар буолбуттара.