Дьокуускай «Тиэргэнинэн ыллыыбыт» аахсыйаҕа холбосто

Ыам ыйын 5 күнүттэн Дьокуускай куорат Бүтүн Арассыыйатааҕы «Тиэргэнинэн ыллыыбыт» аахсыйаҕа кыттыста. 
Бастакынан М.П. Обутова–Эверстова аатынан Култуура киинин кэлэктиибэ Аҕа дойду Улуу сэриитин бэтэрээнэ Роман Тихонович Николаевы эҕэрдэлээтэ. Эҕэрдэҕэ Ыччат уонна социальнай коммуникация миниистирэ Петр Шамаев уонна Марха управатын салайааччыта Николай Ксенофонтов кыттыстылар.
Роман Тихонович Аҕа дойду Улуу сэриитигэр Дьокусукай куораттан 1944 сыл бэс ыйын 5 күнүгэр ыҥырыллан, 94-с стрелковай дивизия 36-с аармыйатын састаабыгар Япония милитаристарын утары кыргыһыыларга кыттар. Сержант Роман Николаев отделение хамандыырыгар тиийэ үүнэн, Сталин махтал суругунан, «Японияны кыайыы иһин» мэтээлинэн, Аҕа дойду сэриитин II-с истиэпэннээх уордьанынан уонна элбэх үбүлүөйдээх бэлиэнэн наҕараадалар, аата Өлөөн улууһун Бочуотун кинигэтигэр киллэриллэр. 
«Гражданскай килбиэн» анал бэлиэ уонна «Кыайыы 75 сыла» үбүлүөйдээх мэтээл хаһаайына Роман Тихонович кэргэнэ Евдокия Прокопьевнаны кытта 65 сыл бииргэ олорон, түөрт оҕо, элбэх сиэн, хос сиэн тапталлаах ийэлэрэ-аҕалара, эбэлэрэ-эһэлэрэ. 
2010 сыллаахха Николаевтар «Саха сирин кыһыл көмүс ыаллара» кинигэҕэ киирбиттэрэ, диэн иһитиннэрэр Олохтоох дьаһалта пресс-сулууспата.