Дьокуускай салалтата крематорий тутуутун көҥүллээтэ

Олохтоох дьаһалта «Быдан Эргиир» ХЭТ киин куоракка колумбарийдаах крематорий тутарыгар көҥүлү биэрдэ. Ити туһунан куорат баһылыгын нэдиэлэтээҕи планеркатыгар этиллиннэ диэн иһитиннэрдэ  Олохтоох дьаһалта пресс-сулууспата. 
Куораты тутууга уонна тырааныспар инфраструктуратыгар Департамент информациятынан, 2021 сыл кулун тутар ыйыгар «Национальная мемориальная компания» ХЭТ диэн Арассыыйа территориятыгар кремациялыыр комплекстары тутуу операторыттан коммерческай этии киирбит. Ити тэрилтэ партнера «Быдан Эргиир» ХЭТ көҕүлүүр этиитэ 2021 сыл ыам ыйыгар көрүллүбүт уонна от ыйын 16 күнүгэр Концессионнай сөбүлэҥ түһэрсиллибит. 
Бырайыак барыллаан сыаната чааһынай инвестор үбүнэн 122 мөлүйүөн солкуобайга тэҥнэһэр. Крематорий биир этээстээх, 313 кв. м., колумбарий  835 кв. м. иэннээх буолаллара былааннанар. Эбийиэк турар сирэ – Маҥанныыр тракка баар куорат кылабыыһатын таһыгар.  
Куораты тутууга уонна тырааныспар инфраструктуратыгар Департамент дааннайдарынан, киин куорат муниципальнай кылабыыһаларыгар сылга ортотунан 1743 көмүү оҥоһуллар. Куорат территориятыгар барыта 5 кылабыыһа баар, итинтэн саҥа көмүллэр сирдэр Маҥан уонна Көтөр фабрикатын дьоҕус оройуонугар арыллыбыттар. Пандемия усулуобуйатыгар Маҥан кылабыыһатын ресурсата 2024 сылга бүтэрэ бэлиэтэннэ. 
«2020 сылга куорат урукку баһылыга Сардана Авксентьева чааһынай үбүлээһин суотугар куорат крематорийын оҥорор туһунан быһаарыыны ылбыта.  2020 сыл атырдьах ыйын 31 күнүттэн балаҕан ыйын 6 күнүгэр диэри куоракка крематорий тутар туһунан нэһилиэнньэттэн ыйытык түмүгүнэн, куораттааҕы интернет порталга 6364 респондентан тутуу ыытылларын кытта 5065 киһи сөбүлэспит,  ити 79,5 % элбэх киһи», – диэн бэлиэтээтэ Куораты тутууга уонна тырааныспар инфраструктуратыгар Департаменын начаалынньыга Северина Архипова.
2020 сыл дааннайдарынан, киһини көмүүгэ оҥоһуллар өҥө төлөбүрүн алын кээмэйэ 16 666 солкуобайга тэҥнэспит. Ол эрэн, ритуальнай өҥө орто кээмэйэ бары ороскуоту киллэрэн туран 90 000  солкуобайга тэҥнэһэр эбит. Ити курдук, үгэс буолбут көмүү нэһилиэнньэ өттүттэн элбэх ороскуоту ирдиир. 
Концессионнай сөбүлэҥ усулуобуйатынан кремация сыаната 27 тыһыынча солкуобайтан тахсыа суохтаах. Комплекс састаабыгар атмосфераны киртиппэт курдук ыраастыыр тэрил киирэр. Эбийиэк 2022 сыл 3 кыбаарталыгар киирэрэ былааннанар.