Дьокуускай оскуолаларыгар харантыын биллэрилиннэ
Дьокуускай куорат Санитарнай-противоэпидемическэй хамыыһыйатын быһаарыытынан, 2022 сыл ахсынньы 9 күнүттэн 17 күнүгэр диэри уопсай уонна эбии үөрэхтээһин тэрилтэлэрин 1-гы кылаастан саҕалаан 8-с уонна 10-с кылаастар үөрэнээччилэрэ быстах кэмҥэ дистанционнай көрүҥүнэн үөрэнэллэр.
«Кылааска ыалдьыбыт оҕо ахсаана 20 %-тан аҕыйах буоллаҕына 9-с уонна 11-с кылаастар очнай көрүҥүнэн үөрэнэллэр», - диэтэ Үөрэҕирии управлениетын начаалынньыга Мария Петрова.
Хааччахтааһын кэмигэр куорат уокуругун территориятыгар үөрэнээччилэр уонна уһуйаан иитиллээччилэрэ кыттыылаах спортивнай уонна култуурунай-маассабай тэрээһиннэр ыытыллыбаттар.
Дьокуускай куорат Санитарнай-противоэпидемическэй хамыыһыйата уонна Роспотребнадзор Саха сиринээҕи управлениета куорат олохтоохторун нэһилиэнньэ мустар сирдэригэр мааскалаах сылдьалларыгар, бэйэ-бэйэлэриттэн 1,5-2 м тэйиччи сылдьар социальнай дистанцияны тутуһалларыгар ыҥырар. Төрөппүттэр оҕолоро элбэх киһилээх сирдэргэ, ол иһигэр киинэ театрдарыгар, маҕаһыыннарга, уопсастыбаннай аһылык тэрилтэлэригэр сылдьалларын хааччахтыыллара наадалаах.
Сонуннар
Ордук ааҕаллар
