Дьокуускай – Нам кыраныыссатыгар баһаары умуруоруу салҕанар

Бэҕэһээ уонна атырдьах ыйын 16 күнэ үүнэр түүнүгэр Дьокуускай куорат уокуругун кыраныыссатыгар, баһаары умуруорар территорияҕа ардаабатах. Ол туһунан Дьокуускайдааҕы ойуур хаһаайыстыбатын кылаабынай лесничэйэ Юрий Кузьмин иһитиннэрдэ. 
Бу иннинэ Уокуруктааҕы дьаһалта, муниципальнай тэрилтэлэр үлэһиттэрин уонна Маҥан сэлиэнньэтин олохтоохторун баһаары кытта охсуһар этэрээттэрэ бульдозеры уонна погрузчигы туһанан Чакыйа үрэххэ тиийбиттэрэ. 
«Ити биһиэхэ баһаары кыраныысса арҕаа өттүттэн тохтоторго көмөлөһөр. Итини тэҥэ илиҥҥи хайысханан 22 км минерализованнай  балаһаны оҥоро атын бульдозер баран иһэр, миэстэтигэр тиийэрэ 10 км хаалла. Оччоҕо куорат уокуругар баһаар бохсулунна диэн этэр кыахтаныахпыт», – диэн этэр Юрий Кузьмин.
Санатар буоллахха, ойуур баһаара куорат уокуругун кыраныыссатыгар, Маҥан сэлиэнньэтиттэн 57 км сиргэ турбута. Баһаары салҕыы ыыппат сыалтан Уокуруктааҕы дьаһалта, муниципальнай тэрилтэлэр үлэһиттэрэ уонна Маҥан сэлиэнньэтин олохтоохторо этэрээт тэрийэн баһаары кытта охсуспуттара. Итиннэ 3 бульдозер, 2 уу таһар массыына, 3 «Беларусь» тыраахтар уонна фронтальнай погрузчик үлэлээтилэр.