Дьокуускай-Москва хайысханан чэпчэтиилээх билиэттэр атыыланаллар

«Якутия» авиахампаанньа Уһук Илиҥҥи федеральнай уокурук олохтоохторугар Дьокуускай-Москва хайысханан чэпчэтиилээх билиэт атыытын саҕалаата диэн хампаанньа пресс-сулууспата иһитиннэрдэ.

Билиэт сыаната – 10 000 солкуобай. Төннөр билиэт сыаната эмиэ итинник суумалаах. Чэпчэки сыаналаах билиэттэри алтынньы 31 күнүгэр диэри атыылаһыахха сөп. Иккитигэр диэри саастаах оҕо анал миэстэтэ суох босхо көтүөн сөп, оттон 2-12 саастаах оҕолорго билиэти 25% чэпчэтиилээх атыылаһыахха сөп.

Билиэттэри куорат ханнык баҕарар каассатыттан уонна «Якутия» авиахампаанньа сайтыттан ылыахха сөп. 

Манна даҕатан эттэххэ, чэпчэтиилээх билиэттэри Арассыыйа Федерациятын Уһук Илиҥҥи федеральнай уокуругар регистрациялаах эрэ дьон атыылаһар кыахтаахтар.