Дьокуускай «Манчаары Оонньуулара» Уотун көрүстэ

Бүгүн, от ыйын 6 күнүгэр, Мэҥэ-Хаҥалас улууһуттан Дьокуускай куоракка спорт национальнай көрүҥнэригэр «Манчаары Оонньуулара» XXI Спартакиада Уота кэллэ. 
Спартакиада Уотун үөрүүлээх быһыыга-майгыга көрсүү Н.Н. Тарскай аатынан «Туймаада» стадиоҥҥа ыытылынна. Эстафета факелын куорат баһылыга Евгений Григорьевка Дьокуускай экстремал-сүүрүктэрин уонна Уот эстафетатын салайааччыта Дмитрий Горохов туттарда. 
«Биһиги куораппыт бүттүүнэ өрөспүүбүлүкэ таһымнаах спортивнай күрэхтэһиигэ кыттарыттан үөрэр. Бүгүн спорт суолтата хаһааҥҥытааҕар да улахан. Араас кыһалҕалар киһиттэн тулууру ирдииллэр, оттон тулуур спортка хатарыллар. Манчаары Оонньууларын Уотун киин куоракка көрсүбүппүт эдэр спортсменнэри кыайыыга кынаттаатын», - диэтэ куорат баһылыга Евгений Григорьев, Дьокуускайга элбэх саҥа спорт эбийиэктэрэ, балаһааккалара тутулла туралларын бэлиэтээн туран. 
Үөрүүлээх тэрээһин кэнниттэн Уот эстафетата салгыы Горнай улууһун кыраныыссатыгар айаннаата. Горнай улууһугар XXI Спартакиада Уотун тириэрдэ куорат баһылыга Евгений Григорьев, Уокуруктааҕы куорат дьаһалтатын аппараатын салайааччыта Руслан Тимофеев, баһылык солбуйааччыта Георгий Гаврильев, физическэй култуураҕа уонна спортка Управление начальнига  Константин Бурцев, Дьокуускай экстремал-сүүрүктэрин салайааччыта Дмитрий Горохов, Горнай улууһун бэрэстэбиитэлэ, чөл олох пропагандиһа Виктор Константинов, СӨ «Сулусспорт» сүүрүүгэ кулуубун бэрэстэбиитэлэ Мария-Анна Васильева, суукканан сүүрүүгэ РФ маастарыгар хандьыдаат Валентина Доргуева,  Сочи куоракка «AlpIndustria Night Trail» уонна саха полумарафонун кыттыылааҕа Виктория Баишева бардылар. 
От ыйын 7 күнүгэр Горнай улууһугар факелтан «Манчаары Оонньуулара» XXI Спартакиада улахан Уота уматыллыа.