Дьокуускай кырдьаҕас оскуолаларыттан биирдэстэрэ хапытаалынай өрөмүөннэнэр

Киин куорат 23 №-дээх В.И. Малышкин аатынан оскуолата 1974 сыллаахха тутуллубута. Оскуола 1200-чэ оҕону сорох предметтэргэ дириҥэтэн үөрэтэр уонна эбии үөрэхтээһининэн дьарыктанар. Билигин манна федеральнай бырагыраама чэрчитинэн хапытаалынай өрөмүөн ыытыллар. Үлэ хаамыытын өрөспүүбүлүкэ вице-премьера Дмитрий Бердников бэрэбиэркэлээтэ. 
Үгүс сыл оскуола кэлэктиибэ уонна төрөппүттэр өрөмүөн ыытыытын туруорсубуттар, ол эрэн үбүлээһинэ кыаллыбатах. 2021 сылга дойдубут бэрэсидьиэнэ Владимир Путин оскуолалар хапытаалынай өрөмүөннэрин бырагырааматын бэлэмнииргэ сорудахтаабыта, билигин ити үлэ дойду үрдүнэн ыытыллар. 
«Быйылгыттан үлэлиир үөрэҕириини модернизациялыыр бырагыраамаҕа оскуола инфраструктуратын өрөмүөннүүр, сайыннарар, бэрээдэктиир үлэ киирэ сылдьар. Ити Дьокуускайга эрэ буолбатах, ыраах оройуоннарга эмиэ. Бырагыраама биир эрэ сыллаах буолбат, бэрэсидьиэн уонна бырабыыталыстыба, баһылыкпыт Айсен Сергеевич  Николаев сыралаах үлэлэринэн 2026 сылга диэри салҕанар. Бары оскуолалар бэрээдэктэниэхтэрэ, материальнай-техническэй баазалара тупсарыллыаҕа», — диэн бэлиэтээтэ Дмитрий Бердников.
Кини оскуола салалтатын кытта хапытаалынай өрөмүөн хаамыытын көрдө, бэдэрээтчиттэри кытта кэпсэттэ. Оскуола дириэктэрэ Георгий Афонскай оҕолор саҥардыллыбыт оскуолаларыгар киирэ охсоору куруук кэлэн оробуочайдары кытта кэпсэтэллэрин, көмөлөһө сатыылларын туһунан кэпсээтэ. 
«Биһиги федеральнай бүддьүөт суотугар хапытаалынай өрөмүөн оҥоһуллар 11 оскуола быыһыгар киирбит дьоллоохпут. Итини ыыттараары симиэтэ оҥорор улахан үлэни көрүстүбүт, симиэтэбит экспертизаны ааста. Саҥа дьыл кэнниттэн «Вертикаль» ХЭТ бэдэрээтчит көстүбүтүгэр сорох үлэ симиэтэҕэ киирбэтэҕин биллибит. Онон билигин хос көрүллүөхтээх. Муус устар 19 күнүттэн үһүс этээскэ өрөмүөн үлэтэ саҕаланна. Ааннары, туалеты оҥоруу уонна кырааскалааһын хаалла. Сакаасчыт ити үлэни от ыйын 31 күнүгэр диэри бүтэриэ дии саныыбын. Оскуола кэтээн көрөр сэбиэтэ уонна төрөппүттэрэ фасаад дизайнын бигэргэппитэрэ. Биир көхтөөх төрөппүт киирии көрүдүөр уонна этээстэр билииткэлэрин дизайнын оҥоро сылдьар. Итини таһынан, 11,2 мөл солкуобай суумаҕа саҥа тэрили, паарталары, интерактивнай дуоскалары, конференц-сибээс тэрилин сакаастаатыбыт. Ити курдук, балаҕан ыйын 1 күнүгэр оҕолор уонна төрөппүттэр чыҥха атын дьиэҕэ киириэхтэрэ», — диэтэ оскуола дириэктэрэ.
Санатар буоллахха, Саха сирин 58 уопсай үөрэхтээһинин тэрилтэлэригэр, 25 муниципальнай оройуоннарыгар уонна куорат уокуруктарыгар 2,89 млрд солкуобай кэриҥэ федеральнай субсидиялар көрүллүбүттэрэ, ол иһигэр 2022 сылга – 2,53 млрд солкуобай, 2023 сылга – 356,89 мөл солкуобай.