Дьокуускай куораттааҕы Быыбар хамыыһыйата буолаары турар быыбарга хандьыдааттартан докумуоннары ылыыны түмүктээтэ

Бэҕэһээ, от ыйын 31 күнүгэр, олохтоох бириэмэнэн киэһэ 18.00 чаастан Дьокуускай куораттааҕы быыбар хамыыһыйата Куорат Дууматын V-c ыҥырыытыгар дьокутаакка хандьыдааттартан докумуоннары тутууну түмүктээтэ.

Уопсайа 362 хандьыдааттан сайабылыанньа киирбититтэн 248 киһи – политическай партиялар испииһэктэринэн, 104 хандьыдаат – биир мандааттаах быыбардыыр уокуруктартан, 10 киһи – бэйэлэрин тус көҥүллэринэн дьокутаакка туруоруммут хандьыдааттар.

Дьокуускай куораттааҕы Быыбар хамыыһыйатын бэрэссэдээтэлэ Сардана Алексеева бэлиэтээбитинэн, биир кэлим уонна биир мандааттаах быыбардыыр уокуруктартан барыта 12 политическай партияттан сайабылыанньа киирбит, ол иһигэр 5 парламентскай партия уонна 1 куорат бэрэстэбиитэллээх уорганыгар баар партия бааллар. Бу партиялартан илии баттааһыны хомуйуу ирдэммэт. Атыттар бары бэйэлэрин өйөтөр илии баттааһыннары туттарбыттар.

«От ыйын 31 күнүгэр илии баттааһыннаах кумааҕылары маннык политическай партиялар туттардылар: «Родина», «Партия пенсионеров за социальную справедливость», «Коммунисты России», «ЗЕЛЕНЫЕ» «Партия ДЕЛА». «ЯБЛОКО» политическай партия илии баттааһыннаах кумааҕыны туттарбата. 9 самовыдвиженец илии баттааһыннаах лиистэрин туттардылар. Хамыыһыйа билигин киирбит докумуоннары, илии баттааһыннары бэрэбиэркэлиир. Ол кэннэ регистрацияламмыттарын эбэтэр регистрацияны ааспатахтарын туһунан быһаарыы тахсыаҕа. Бу үлэ 2023 сыл атырдьах ыйын 9 күнүгэр түмүктэниэҕэ»,– диэн быһаарар  Сардана Алексеева. 

Атырдьах ыйын 1 күнүнээҕи туругунан Дьокуускай куорат Дууматыгар 115 дьокутаакка хандьытаат регистрацияны ааста. Быыбарга туруоруммут уонна регистрацияны ааспыт хандьыдааттар испииһэктэрин ЯГТИК.ру официальнай саайтыгар көрүөххэ сөп. 

Саха Өрөспүүбүлүкэтин Киин быыбардыыр хамыыһыйатын быһаарыытынан Дьокуускай куорат Дууматын быыбара быйыл үс күн – балаҕан ыйын 8, 9 уонна 10 күннэригэр ыытыллар.