Дьокуускай «IT-киин куорат» бырайыагы билиһиннэрдэ

Уһук илиҥҥи куораттар сайдыыларын былааннарын презентациятыгар Дьокуускай «IT-столица» диэн куорат социальнай-экономическай сайдыытын бырайыагын билиһиннэрдэ. Бу туһунан баһылык уонна бырабыыталыстыба пресс-сулууспата иһитиннэрдэ. 
Презентация ВЭБ.РФ сайдыытын уонна «СКОЛКОВО» 100 улахан куораттар салайар каадырдарын бырагыраамаларын чэрчитинэн ыытылынна. Тэрээһиҥҥэ Саха сирин Ил Дархана Айсен Николаев кытынна.
«Дьокуускай соруга киэҥ далааһыннаах буолуохтаах. Өрөспүүбүлүкэ баһылыга буоларбар IT эйгэтигэр 1500 киһи үлэлиир этэ, билигин – 3500. 2024 сылга диэри ити сыыппара 10 тыһыынча киһиэхэ тиийиэхтээх, итини түргэнник ситиһиэхпит дии саныыбын. Биһиэхэ Ураал уҥуоргу өттүгэр саамай бөдөҥ 10 тыһ. кв. м. тахса иэннээх, оҥоһуу интеллектэн саҕалаан сүдү суолталаах соруктары быһаарар резиденнэрдээх IT-паарка баар», — диэтэ кини.
Бүгүҥҥү күҥҥэ Саха сирин IT-салаатыгар 5 000 исписэлиис баар, 2030 сылга диэри 25 000 киһи буолуохтаах. Ити эйгэҕэ үлэлиир предпринимателлэр 1 млрд. дуоллар кэриҥэ харчыны киллэрэллэр, инники өттүгэр дохуот 20 млрд. дуоллартан тахса буолуохтаах.
«2030 сылга диэри IT-салаатыгар үлэлээччилэр ахсааннарын 5 тыһыынчаттан 25 тыһыынчаҕа диэри элбэтиэхпитин баҕарабыт. Цифровой эйгэ хас биирдии куорат олохтооҕо бэйэтин кыаҕын толору арыйарыгар олук уурар. Сыалбытын ситиһэргэ хас да улаҕан блогу бэлиэтээтибит: тиһиктээх IT-үөрэхтээһин систиэмэтин оҥоруу, куорат хаһаайыстыбатын цифровизациялааһын, табыгастаах куорат эйгэтэ, экономика креативнай  тэтимин үрдэтии», — диэн презентацияҕа кэпсээтэ куорат баһылыга Евгений Григорьев.
Бэлиэтээн этиллибитинэн, былааннары «гибриднай» көрүҥүнэн, бары санитарнай-эпидемиологическай миэрэлэри тутуһан көмүскээбиттэр. Тэрээһин кыттыылаахтара ПЦР экспресс-тиэстэрин туттарбыттар