Дьокуускай историятын музейа сэдэх харыйа оонньуурдарын хомуйар

Киин куорат историятын музейа, «Кыһын Саха сириттэн саҕаланар» тэрээһин чэрчитинэн, «Харыйа оонньуурун кистэлэҥэ» диэн декоративнай-прикладной айымньы быыстапка-күрэҕин ыытар.

Сэтинньи 16 күнүттэн ахсынньы 4 күнүгэр диэри куорат олохтоохторо Аммосов уул., 1/1 (Кырдьаҕас куорат, 40-25-83) баар Куорат историятын музейыгар саҥа дьыллааҕы киэргэллэрин аҕалыахтарын сөп. Быыстапка-күрэх 3 номинациянан ыытыллар: «Ретро-оонньуур», «Аныгы оонньуур», «2022 сыл бэлиэтэ оонньуур». Номинация аайы үстүү кыайыылаах талыллан, анал дипломнарынан уонна сыаналаах бириистэринэн бэлиэтэниэхтэрэ. 
Наҕараадалааһын ахсынньы 15 күнүгэр «Харыйа оонньуурун кистэлэҥэ» быыстапка-күрэх үөрүүлээх аһыллыытыгар Дьокуускай историятын музейыгар буолуоҕа. 
«Кыһын Саха сириттэн саҕаланар» бэстибээл быйыл, 2021 сылга, онус төгүлүн ыытыллар. Сыл аайы өрөспүүбүлүкэ киин куоратын олохтоохторугар уонна ыалдьыттарыгар араас куонкурус, маастар-кылаастар, быыстапкалар, муода көрдөрүүтэ уонна саҥа дьыллааҕы харыйаны уматыы тэриллэр.