Дьокуускай бочуоттаах олохтоохторун туһунан быыстапка аһылынна

Тэрээһин үөрүүлээх аһыллыытыгар култуура уонна духуобунай сайдыы миниистирин бастакы солбуйааччы Владислав Левочкин, куорат баһылыга Евгений Григорьев, Дьокуускай куораттааҕы Дуума бэрэссэдээтэлэ Альберт Семенов, куорат уопсастыбаннаһа, бочуоттаах олохтоохторо, архивистара кытыннылар. Владислав Левочкин архыып кэлэктиибигэр сыралаах үлэлэрин иһин махталын биллэрдэ уонна быыстапка үбүлүөйдээх тэрээһиннэр киэргэллэринэн буолуоҕа диэтэ.

«Куораттааҕы уонна Национальнай архыыптарбыт улахан үлэни оҥордулар – Дьокуускай үбүлүөйүн көрсө куорат сайдыытыгар сүдү кылааттарын киллэрбит биллиилээх бочуоттаах олохтоохтор тус быыстапкаларын тэрийдэ», - диэтэ Левочкин уонна Култуура уонна духуобунай сайдыы министиэристибэтин аатыттан куорат архыыбыгар Махтал суругу туттарда.

Быыстапкаҕа хаартыскалар, докумуоннар, кинигэлэр тиэмэлэринэн наарданан киэҥ араҥаҕа таҕыстылар. Манна Национальнай архыып революция иннинээҕи пуондатыттан Дьокуускай куорат бочуоттаах олохтоохторун туһунан докумуоннар уонна хаартыскалар бааллар. Олор ортолоругар – губернатордар К.Н. Светлицкай, И.И. Крафт, куорат баһылыга П.А.Юшманов, меценат-атыыһыт М.Д.Эверстов уо.д.а. олохторун сырдатар матырыйааллар.

Быыстапка балаҕан ыйын 30 күнүгэр диэри Олохтоох дьаһалта 2-с этээһин фойетыгар туруоҕа, аадырыһа: Дьокуускай к., Ленин пр., 15.