Дьокуускай автопаарката саҥа 100 оптуобустанна

Гааһынан айанныыр тиэхиньикэни субсидиялыыр РФ Минпромторгун бырагырааматын өйөбүлүнэн атыылаһыллыбыт саҥа  100 оптуобус барыта киин куоракка кэллэ. Муус устар 25 күнүгэр оптуобустар күлүүстэрин өрөспүүбүлүкэ Ил Дархана Айсен Николаев туттартаата. Бу туһунан СӨ Тырааныспарга уонна суол хаһаайыстыбатыгар министиэристибэтин пресс-сулууспата иһитиннэрдэ. 
«Бүгүҥҥү түбэлтэ — куорат оптуобуһун пааркатын дьоһун саҥардыы. Куорат доруобуйаларын туругунан хааччахтаах гражданнарга сөп түбэһэр, уопсастыбаннай тырааныспар бары ирдэбиллэригэр эппиэттиир 100 оптуобустанна. Бу саҕалааһын эрэ. Быйыл Дьокуускай куоракка өссө тыраанаспары салайар саҥа систиэмэ, саҥа маршруттар, биир кэлим билиэттэр баар буолуохтара диэн эрэнэбин», — диэтэ Айсен Николаев.
Тырааныспар уонна суол хаһаайыстыбатын миниистирэ Владимир Сивцев информациятынан, тырааныспар Арассыыйаҕа –   Курганскайдааҕы уонна Павловскайдааҕы оптуобус собуоттарыгар оҥоһуллубут. Саҥа оптуобустар экологичнайдар, газомоторнай оттугунан сылдьаллар, онон атмосфераҕа буортулаах эттик тахсара намтыыр. 
Саҥа тиэхиньикэ хоту сиргэ барсар гына оҥоһуллубут – оптуобустар тымныы кэмҥэ тиһигин быспакка үлэлиэхтэрин, салоҥҥа сылааһы тутуохтарын сөп, ону сэргэ сайыҥҥы өттүгэр үлэлииргэ эмиэ табыгастаахтар.  Иккилии хос түннүктээхтэр, салоннара эбии ититиилээх, кондиционердаах. 
 «Бүгүн биһиги Дьокуускай куорат оптуобуһун пааркатын чиэппэрин саҥардан биэрдибит, итинтэн 10 оптуобус муниципалитеттар икки ардыларыгар сылдьыахтара. Ити уопсастыбаннай тырааныспары саҥардыы бастакы эрэ түһүмэҕэ. Саха сирин бөдөҥ оройуоннара оптуобуһу атыылаһарга субсидиялааһын судаарыстыбаннай бырагыраамаларыгар кыттарга бэлэмнэр. Собуоттарга тиийэн оҥороллорун хонтуруоллаабыппыт, онон оптуобустар хаачыстыбалаахтык хомуллубуттара диэн эрэллээхтик этиэхпитин сөп», - диэн иһтиннэрдэ Владимир Сивцев. 
Оптуобустарга «үйэ тухары сылдьар саха халандаара» оһуор түһэриллибит, дизайн-кодун регионнааҕы Архитектура управлениетын сакааһынан «LETOYAKUTIA» киин оҥордо. Кыһыҥҥы тумаҥҥа үчүгэйдик көстөллөрүн курдук оптуобустарга кыһыл өҥү талбыттар. Регистрация кэнниттэн ыам ыйын устата саҥа тырааныспар үлэтин саҕалыахтаах. 
Өрөспүүбүлүкэ уопсайа 55 «КАвЗ-4270 LE» уонна 10 «КАвЗ-4238» тииптээх 84 пассажирскай миэстэлээх, куорат кытыытыгар сылдьарга 35-39  миэстэлээх оптуобустары атыыласта. Итини сэргэ 30-туу миэстэлээх 35 «Вектор NEXT 8.8» оптуобустар кэллилэр. Ити сыалга федеральнай бүддьүөттэн оптуобус оҥоһуутун субсидиялааһыҥҥа 193 мөл солкуобай,  өрөспүүбүлүкэ бүддьүөтүттэн 120 мөл солкуобай лизинговай төлөбүргэ көрүлүннэ. «ЯПАК» МУТ 65 оптуобуһу ылла, 35-һи – «Союз Авто» кэмиэрсийэтэ суох тэрилтэ чааһынай тиэйээччилэрэ.