Дьокуускай – Аллараа Бэстээх хайысханан салгын олбохтоох суудуналарынан пассажирдары тиэйии саҕаланна

Өлүөнэ өрүһүнэн кыһыҥҥы суол сабыллыбытынан муус устар 24 күнүттэн 204-с дьоҕус оройуоҥҥа тэриллибит саҥа «Намыв» ыстаансыйатыттан салгын олбохтоох уу аалларынан пассажирдары тиэйии саҕаланна.
Айан төлөбүрэ 2000 солк. тэҥнэһэр, муус күүскэ барар кэмигэр 2500-3000 солк. диэри үрдүүрэ күүтүллэр. Суудуналар сарсыарда 07:00 чаастан киэһэ 20:00 чааска диэри сылдьаллар. Линияҕа «ЛенаВодСервис» уонна «ЛенаТранс» тэрилтэлэр холбоон 30 «Хивус-10», 3 «Нептун-23» уу аалларын уонна 8 «Тайфун» аэроботу таһаараллар.
Уу ааллара Дьокуускай куоракка «Намыв» ыстаансыйаҕа, Аллараа Бэстээххэ тимир суол ыстаансыйатыгар тохтууллар, диэн иһитиннэрэр СИА.
Оттон Дьокуускай куораттааҕы суол-тырааныспар сулууспата иһитиннэрэринэн, «Намыв» ыстаансыйаҕа диэри пассажирдары сарсыарда 08.00 чаастан киэһэ 18.00 чааска диэри босхо тиэрдии олохтонор.