Дьокуускай аэропордун көтөр балаһата аһылынна

«Дьокуускай» аэропорт көтөр-түһэр балаһата аһылынна. Аэродром уонна сөмөлүөт көтөр-түһэр балаһатын өрөмүөннэммит 625 м. уһуннаах учаастагын сертификацията бүттэ. Ол туһунан өрөспүүбүлүкэ тырааныспарга Министиэристибэтэ иһитиннэрдэ. 
Атырдьах ыйын 17 күнүгэр 2:00 чааска  «Дьокуускай» аэропорт 3250 м. оробуочай уһуннаах көтөр-түһэр балаһата үлэҕэ киирдэ. 
Балаһа сертификациятын Росавиация уонна Ростехнадзор Арассыыйа президенэ Владимир Путин сорудаҕынан кылгас болдьоххо ыыттылар.  Билиҥҥи туругунан аэропорт балаһатыгар араас көрүҥнээх салгын суудуналара кэлэн түһэр кыахтаннылар, ол иһигэр ойуур баһаардарын кытта охсуһарга төһүү күүһүнэн буолар БЕ-200 уонна Ил-76 сөмөлүөттэр.
Сотору кэминэн Саха сиригэр көтөр сөмөлүөттээх авиахампаанньалар эриэйсэлэрин саҕалыахтара. Ити боппуруос өрөспүүбүлүкэ тырааныспарга уонна суол хаһаайыстыбатыгар Министиэристибэтин ураты хонтуруолугар сылдьар. 
Эриэйсэлэр кэлэр-барар бириэмэлэрин туһунан информация авиациянан таһааччылар официальнай сайтарыгар уонна аэропорт электроннай онлайн таблотыгар тахсар: https://yks.aero/, ону тэҥэ босхо ыйыталаһар нүөмэр үлэлиир: 8 (4112) 31-88-44.