Дьокуускай 100 бастыҥ үөрэнээччитигэр стипендия олохтонно

Ахсынньы 1 күнүгэр, «Кыһын Саха сириттэн саҕаланар» бэстибээл чэрчитинэн,  киин куорат Ленин болуоссатыгар  саҥа дьыллааҕы елка уоттарын уматыы тэрээһинигэр куорат баһылыга Евгений Григорьев Дьокуускай 100 бастыҥ үөрэнээччитигэр анал стипендия олохтоммутун туһунан иһитиннэрдэ.

«Бүгүн оҕолорбутугар, Дьокуускай үөрэнээччилэригэр саҥа дьыллааҕы үчүгэй бэлэх туһунан биллэриэхпин баҕарыбын. Муниципальнай оскуолалар үөрэххэ, уопсастыбаннай олоххо уонна спортка уһулуччу ситиһиилэрдээх бастыҥ үөрэнээччилэригэр 20 тыһыынча солкуобай суумалаах стипендияны олохтуур туһунан уураахха илии баттаатым. Стипендияны Ю.А. Гагарин аатынан Култуура уонна аныгы искусство киинигэр саҥа дьыл саҕана туттарыахпыт. Наҕарааданы 2022 сыл түмүгүнэн 100 бастыҥ үөрэнээччи ылыаҕа. Ити оҕолору ситиһиилэргэ көҕүлүүр үтүө кылаатынан буоларыгар эрэллээхпин», - диэтэ Евгений Григорьев.