Дьокутааттар куорат бүддьүөтүгэр уларытыылары киллэрдилэр

Муус устар 5 күнүгэр буолан ааспыт Дьокуускай куорат Дууматын уочараттаах 47-с сессията 2023 сыллааҕы уонна кэлэр 2024-2025 сыллардааҕы бүддьүөккэ уларытыылары киллэрдэ.

Куорат дьокутааттара 2022 сыл ахсынньы 21 күнүгэр ылыллыбыт «2023 сылга уонна былааннаах 2024-2025 сылларга «Дьокуускай куорат» Куорат уокуругун бүддьүөтүн туһунан» сокуоҥҥа уларытыылары киллэрдилэр.

Олохтоох дьаһалта Үп департаменын начаалынньыга Ольга Максимова иһитиннэриитинэн, бүддьүөккэ уларытыылары киллэрэр туһунан быһаарыы бырайыагар 2023 сыл тохсунньу 1 күнүнээҕи туругунан олохтоох бүддьүөт үбэ, нолуоктан киирбит уонна нолуогу таһынан дохуотун кээмэйэ чуолкайдаммыта, 2023-2025 сылларга муниципальнай бырагыраамаларга уларытыылар киирбиттэрэ уонна ыстатыйалар кодтара уларыйбыта төрүөт буолбуттар.

Үп департаменын начаалынньыга Ольга Максимова иһитиннэрбитинэн, 2023 сылга бүддьүөт дохуотун уопсай иэнэ 857 052,6 тыһ. солк. үрдээн, барыллаан ааҕыынан,  25 855 225,5 тыһ. солк. тэҥнэһиэхтээх. Оттон ороскуот кээмэйэ 1 883 569,5 тыһ. солк. элбээн, 26 881 742,4 тыһ. солк. буолуохтаах, диэн Дьокуускай куорат Дууматын пресс-сулууспата иһитиннэрэр.