Дьокутааттар элбэх оҕолоохторго сири биэриини дьүүллэстилэр
Куорат дууматын ыччат политикатыгар, физическэй култуураҕа, спортка уонна чөл олоххо сис кэмитиэтин мунньаҕар сүрүн иһитиннэриини «Сир сыһыаннаһыыларыгар агентство» муниципальнай тэрилтэ салайааччыта Акулина Друзьянова оҥордо.
Дакылаатчыт кэпсээбитинэн, босхо сир уочаратыгар 7519 элбэх оҕолоох ыал турар. Олортон 93 ыал олорор усулуобуйаны тупсарыы уочаратыгар турар. Бүгүҥҥү күҥҥэ 3882 элбэх оҕолоох ыалга сирдэрин схемата, ол иһигэр 3430 ыал учаастагын докумуоннаппыт (Ааспыт 2021 сылга 85 ыал докумуоннаппыт), 2022 сыл от ыйын 8 күнүнээҕи туругунан – 57 ыал.
Дакылаатчыт иһитиннэрбитинэн, бүгүҥҥү күҥҥэ сир учаастактарын Бүлүү суолугар уонна Намцыр трагар биэрэллэр. Ону сэргэ Маҕаҥҥа биэс учаастагы муниципальнай бас билиигэ биэрэн элбэх оҕолоохторго үллэриигэ, Тулагыга сир учаастактарын көрүүгэ үлэ ыытыллара бэлиэтэннэ. «2018 сыллаахха Саха өрөспүүбүлүкэтэ 2018 сыл ахсынньы 31 күнүгэр диэри сир учаастагыттан аккаастаммыт элбэх оҕолоохторго «Семья» хапытаал харчытын икки бүк улаатыннарар туһунан быһаарыыны ылыммыта. Бу балаһыанньанан 44 ыал туһаммыт.
«Сир сыһыаннаһыыларыгар агентство» МКУ салайааччыта итини сэргэ агентство былырыын, 2021 сылга, СӨ баайга-дуолга уонна сир сыһыаннаһыыларыгар министиэристибэтигэр сир учаастагыттан аккаастанар элбэх оҕолоох ыалларга компенсация харчыны биэриини сокуонунан бастайааннай төрүккэ олохтуурга киллэрбит этиитин бүгүҥҥү күҥҥэ СӨ сиргэ-уокка, баайга-дуолга сыһыаннаһыыларыгар уонна Үлэ уонна социальнай сайдыы министиэристибэлэринэн көрүллэ сылдьарын тоһоҕолоон бэлиэтээтэ.
Сонуннар
Ордук ааҕаллар
