Дьоһун суолталаах бырайыактар

Бүгүн Саха сирэ Уһук Илин үрдүнэн IT-өҥөтүн экспорка таһаарыыга инники күөҥҥэ турар уонна дойду үрдүнэн уон бастыҥ цифровой регион ахсааныгар сылдьар. Ааһан эрэр сылга бүтэһик нүөмэрбитигэр информационнай технология салаатыгар, чуолаан сыһыарыылары оҥорууга Саха сирин бастыҥ бырайыактарын сырдатабыт.

«Дьиэлээ» – улууска тахсыы өссө судургутуйда

Бэрт соторутааҕыта Саха сиригэр уһун айаҥҥа турунар дьоҥҥо аналлаах «Dealee” диэн саҥа сыһыарыы таҕыста. Суоппардарга уонна айанньыттарга чэпчэки сыанаҕа айанныыр кыаҕы үөскэтэр сыһыарыы онлайн-платформаҕа уонна төлөпүөҥҥэ үлэлиир. Ол эбэтэр суоппардар ханнык куораттан, улуустан ханна айанныылларын, ону тэҥэ тырааныспарка ороскуоттарын ыйар, туһанааччы төһө харчыга айанныырга бэлэмин быһаарар  кыахтаналлар.

Манна даҕатан эттэххэ, суоппардарга да, айаннааччыларга да сыһыарыы төлөпүөннэрин нүөмэрдэрин, тус дааннайдарын ыйбат. Кэпсэтии барыта табыгастаах чат нөҥүө ыытыллар.

«Dealee» такси сакаастыырга буолбатах, кыттыһан айанныырга аналлаах. Ол эрээри манна эмиэ биһиги хардарыта барыстаах кэпсэтии тутулун салгыы сайыннарабыт. Аргыстар бэйэ-бэйэлэрин эмиэ рейтинтэн, туһаммыт дьон санаатыттан, итиэннэ массыына туругуттан, төһө миэстэ баарыттан көрөн талаллар. Онтон атынын чат нөҥүө быһаарсаллар”, – диэн бэлиэтиир сыһыарыы тэхиньиичэскэй дириэктэрэ Тарас Егоров.

Биллэриилэри таһаарар «Мои объявления»

Уопсастыба олоҕун-дьаһаҕын хас биирдии эйгэтэ сыыппараҕа көһөн эрэр, онон араас сыһыарыыны айыы, оҥоруу олох ирдэбилигэр кубулуйда. Биир туһалаах, олоҕу чэпчэтэр инновационнай быһаарыынан «Мои объявления» мобильнай сыһыарыы буолар. Бу сыл ыам ыйыттан үлэтин саҕалаабыт сыһыарыы ааптардарынан эмиэ бэйэбит ыччаттарбыт, ИТ-парка резиденнэрэ буолаллар. Билигин «Мои объявления» сыһыарыыны App Store-тан, Google Play-тан хачайдаан ылыахха сөп.

Сыһыарыыга куораттар, сэлиэнньэлэр, нэһилиэктэр бары киирэ сылдьаллар. Саха сирин олохтоохторугар табаары, өҥөнү уонна үлэни өрөспүүбүлүкэ бары нэһилиэнньэлээх пууннарыгар таһаарарга көмөлөһөр күүстээх инструмены нэһилиэнньэ биһирээтэ.

Ийэ буолаары сылдьар кэрэ аҥаардарга туһалаах

«MotherFit” сыһыарыы хат буолбут дьахталларга араас гимнастиканы оҥотторор араас дьарыктаах. Быйыл сайын сыһыарыы социальнай ситим “VK”  «Start Apps” күрэҕэр кыттан, «Сколково» пуондаттан бырайыагы салгыы сайыннарга грант ылары ситистэ.

«Биһиги сыһыарыыбыт онлайн-дьарык хомуурунньуга буолар. Дьарыктар былчыҥнары бөҕөргөтөргө, өйү-санааны тупсарарга уонна болҕомтону түмэргэ көмөлөһөллөр», – диэн бырайыак ааптара Диана Дуглас бэлиэтиир.

Оҕо көрөөччү куруук наада

«Якутия» технопаарка резиденнэрэ оҕо көрөөччүлэри булар «Под присмотром» сыһыарыылара эмиэ App Store-га уонна Google Play-га баар.

Манна анал үөрэхтээх иитээччилэр, педагогтар, быраастар уонна устудьуоннар үлэлииллэр. Сыаната – биир чааһа 300 солкуобайтан саҕаланар.

Оҕону 3 ыйыттан 9 сааһыгар диэри көрөллөр. Оттон кинилэр үлэлэригэр сыана туруоруллар, сыанабыл суруллар.

Сыһыарыыга оҕо көрөөччүнү уонна оҕону видео нөҥүө көрүөххэ сөп. Билиҥҥитэ бу сыһыарыынан 300-тэн тахса төрөппүт уонна 100-тэн тахса оҕо көрөөччү туһанар.

Аһы-үөлү тиэрдэн биэрэр сыһыарыы

Өрөспүүбүлүкэҕэ бородууктаны уонна да атын малы-салы тиэрдэн биэрэр сыһыарыы былырыыҥҥыга диэри суоҕун кэриэтэ этэ. Баар да буоллаҕына, «тос» курдук сыанаҕа тиэрдэн биэрэллэрэ. Биллэн турар, бу кыһалҕаны сытыы-хотуу уол Сергей Протопопов «Boon Market» диэн ааттаах сыһыарыытынан номнуо быһааран олорор.

Сыһыарыы сүрүн уратытынан аһы-үөлү тиэрдэн биэрэрин таһынан, күннээҕи олоххо туттуллар хаһаайыстыбаннай малы-салы, бытовой химияны, таҥаһы уонна да атын туһалаах табаары тиэрдэрэ буолар. Баараҕай бырайыактары оҥорооччулар былааннара киэҥ, кэлэр сылтан Арассыыйа үрдүнэн үлэлиири толкуйдууллар!

«STEAM» платформаҕа Саха сирин бастыҥ оонньуута

Сайын саҕаланыыта «Frozen Line» устуудьуйа «Daydream: Forgotten Sorrow» диэн оонньуутун «STEAM” платформаҕа биир бастакынан сүрүн сирэйгэ таһааран, бастыҥ оонньуу быһыытынан ааттаммыта. Оонньуу араас сорудахтартан, тургутуулартан турар. Айан таһаарааччылар Андрей Максимов уонна Николай Баишев бэлиэтииллэринэн, кинилэргэ Антуан де Сент-Экзюпери «Кырачаан принц» айымньыта тирэх буолбут.

Халлаан туругун көрдөрөр сыһыарыы

Артём Ослопов уонна кини хамаандата Арассыыйаҕа ыытыллыбыт «Моя страна – моя Россия» күрэххэ «Тикси. Погода» (TiksisWeather) диэн сыһыарыытынан кыайыылаах үрдүк аатын сүктэ. Бу сыһыарыы көмөтүнэн уһук хоту сир хайа баҕарар муннугар олорон, халлаан туругун, салгын температуратын билиэххэ сөп.

«Обращайся»  кыаҕа кэҥиир

«Сахавизион» IT-хампаанньа «Обращайся» диэн саҥа мобильнай сыһыарыыны, ону таһынан интэриниэккэ тус балаһааккатын арынна. “Обращайся” – олох-дьаһах кыһалҕаларын судургутутарга, судаарыстыбаннай уонна муниципальнай тэрилтэлэр үлэлэрин, бизнес көдьүүһүн үрдэтэргэ саҥа кыахтары арыйар кэскиллээх бырайыак.