Дьиэ кэргэттэри өйөөһүҥҥэ 880 мөл. солк. тахса туһуланна

Үбүлээһин сорох чааһа анал байыаннай эпэрээссийэ кыттыылаахтарын дьиэ кэргэттэригэр уонна чугас аймахтарыгар 200 тыһыынча солкуобай суумалаах биир төгүллээх төлөбүргэ ыытылынна. Бүгүҥҥү күҥҥэ төлөбүрү үгүс киһи, СӨ тас өттүгэр хантыраак түһэрсибит байыаннай сулууспалаахтартан ураты, ыллылар.

Өрөспүүбүлүкэ судаарыстыбаннай бүддьүөтүттэн 7,5 мөл. солкуобайтан тахса 984 5-11 кылаас үөрэнээччилэрин босхо итии аһылыгынан хааччыйыыга барда, оҕолор төрөппүттэрэ – анал байыаннай эпэрээссийэ кыттыылаахтара.

2022 сыл балаҕан ыйыттан ахсынньы ыйыгар диэри 840-тан тахса оҕо төрөппүтэ төлөбүртэн босхолонно, бүддьүөттэн ороскуоту уйунууга 6,3 мөл солкуобай көрүлүннэ.

Байыаннай сулууспалаахтар оҕолорун лааҕырдарга сынньатар босхо путевкаҕа 880-тан тахса сайаапка киирдэ.

Өйөбүл миэрэтинэн байыаннай сулууспалаахтар устудьуон оҕолоро эмиэ туһаналлар. Ол курдук, ахсынньы 5 күнүнээҕи туругунан, тус сыаллаах үөрэниигэ 102 сайаапка киирдэ. 152 орто анал уонна 69 үрдүк үөрэх кыһатын устудьуоннара үрдэтиллибит социальнай стипендияны ылаллар.

Анал байыаннай эпэрээссийэҕэ бааһырбыт гражданин эмтэнэ сытар сиригэр барыыга биир төгүллээх төлөбүрүнэн 18 байыаннай сулууспалаах дьиэ кэргэнин чилиэннэрэ уонна чугас аймахтара туһаннылар.

4,8 тыһыынчаттан тахса киһи психологическай көмөнөн хабылынна, 35 байыаннай сулууспалаах өрөспүүбүлүкэ медицинскэй тэрилтэлэригэр эмтэннэ, 2 киһи чөлүгэр түһүүнү ааста, 29 – ааһар.

Байыаннай сулууспалаахтар төрөппүттэрэ санаторнай-курортнай эмтэниинэн туһаныахтарын сөп, анал байыаннай эпэрээссийэ кыттыылаахтара 2022 сылга тырааныспар нолуогуттан босхолоннулар, итиэннэ өрөспүүбүлүкэ бүддьүөтүн суотугар олорор дьиэлэригэр гаас холботуохтарын сөп.