Дьиэ кэргэни сомоҕолуур кыһыҥҥы дьарыктар

Былырыын “Бичик” кинигэ кыһата (“Айар” диэн ааттана илигинэ) таһаарбыт “Саха ыалын халандаарыгар” кэрэхсэбиллээх идиэйэлэри булуохха сөп. Кыһыҥҥы уһун киэһэлэри киэргэтэр, дьиэ кэргэни түмэр сүбэлэри туһаныҥ. 

Өҥнөөх ууну формаларга кутан тоҥорон, харыйа оонньуурдарын оҥоруу уонна таһырдьа турар маһы симээһин.

Дьиэҕэ өҥнөөх кубик муус оҥортоон, таһырдьа араас фигуралары оҥоруу.

Салгын шарын уунан толорон, 2 хааппыла ас кырааскатын кутан, тоҥоруҥ. Сарсыныгар шар хаҕын кыптыыйынан кырыйан ылыҥ. Таһырдьа тахсан хаартыскаҕа түһүҥ, оонньооҥ, шаргытын дуоһуйа көрүҥ.

Дьиэ кэргэнинэн кумааҕыттан хаардары кырыйыы.

Хаартан дьиҥнээх скульптураны таптайан оҥоруу, кырааскалааһын уонна өр турарын наадатыгар ууну кутуу.

Бары биир таҥастаах дьиэ кэргэн фотосессиятын тэрийии.

Караокеҕа оҕо саҥа дьыллааҕы ырыаларын ыллааһын.

Саҥа дьыл туһунан остуоруйа кинигэтин атыылаһыы уонна ааҕыы.

Таабырын киэһэтин тэрийии.

Муус аннынан балыктааһыҥҥа сылдьыы.

Пейнтбол оонньооһун.

Чыычаах уйатын оҥорон маска ыйааҥ, чыычаахтары аһатыҥ.

Дьиэ мороженайын оҥоруу.

Бытыылкаларга кырааскалаах ууну (ас кырааската) кутан, хаарга уруһуйдааһын.

Тымныыга тахсан мыыла күүгэннэрин үрүү, муус шариктар буолалларын көрүү.

Дьиэ иһигэр кистэммит бэлэхтэри суругунан сонордоон булуу.

Ким саамай улахан хаар мөчөҕү оҥоруутугар күрэхтэһии.

Үүнэр сылга биир уопсай баҕа санаа коллаһын оҥоруу, истиэнэҕэ ыйааһын.

Хаар кириэппэһи тутан, хаарынан бырахса оонньооһун. Манна снежколеп көмөтүн туһаныахха сөп.

Дартс оонньууну оонньуохха сөп.  

Саха ыалын халандаара, 2021 сыл.