Дьиэ кэргэн уонна оҕолонуу статистика хараҕынан

От ыйын 8 күнүгэр бэлиэтэнэр Дьиэ кэргэн, таптал уонна бэриниилээх буолуу күнүнэн Судаарыстыбанннай статистика Саха сиринээҕи территориальнай салаата кэккэ түмүктэри таһаарда.
Ол курдук, Сахастат пресс-сулууспата иһитиннэрэринэн, 2023 сылга Саха Өрөспүүбүлүкэтигэр 5568 ыал эбиллибит, дьиэ кэргэн тэринэргэ санаммыт эр дьон орто сааһа – 24, кэрэ аҥаардар – 25. Оттон эр-ойох буолууга сөптөөх кэминэн сайыҥҥы өттүгэр бэс ыйын, кыһын ахсынньы ыйы ордороллоро бэлиэтэммит. Бу ыйдарга ордук элбэх ыал үөскээбит.
Саха Өрөспүүбүлүкэтэ оҕо төрөөһүнүнэн (1000 нэһилиэнньэҕэ) Уһук Илиҥҥэ – бастакы, Арассыыйаҕа ахсыс миэстэҕэ турар. Ааспыт 2023 сылга төрөөбүт оҕо 28% – дьиэ кэргэн бастакы оҕото, эмиэ итиччэ оҕо ыал иккис оҕотунан күн сирин көрбүт. 
Ил Дархан уонна Бырабыыталыстыба пресс-сулууспата суруйбутун курдук, ЗАГС чахчытынан, 2024 сыл аҥаарыгар Саха сиригэр 5 318 кырачаан күн сирин көрбүт, ол иһигэр: 2 656 уол уонна 2 662 кыыс. Аҥаардас бэс ыйыгар 911 оҕо төрөөбүт: 474 уол уонна 437 кыыс.
Бэс ыйыгар төрөөбүт уолаттары сүрүннээн Тимур, Эркин, Мирон, Арылхан, Артём, Сайаан, Роман, Эрэл, Александр, Виктор, Алексей, Лев, Максим уонна Дмитрий диэн сүрэхтээбиттэр.
Сэдэх уонна ураты ааттарга Лев Альберто, Ариан, Милан, Илёс, Моруот, Алиан, Диас, Гордей киирсэллэр.
Оттон кыыс оҕолору саамай элбэхтик София, Сайаана, Ева, Кэрэли, Амелия, Оливия, Аделина, Арина уонна Виктория диэн ааттаабыттар. Ураты уонна сэдэх ааттар – Наина, Томирис, Ивангелия, Кия, Лисэль, Мартиша, Алёта, Аяврина-Нолтэк, Халиммахон, Ивалина.