«Дьиэ кэргэн хамаандата» бэстибээл салҕанар

Тэрээһин чэрчитинэн, Култуура уонна сынньалаҥ пааркатыгар 82 киһилээх дьиэ кэргэн хамаандата спортивнай ориентированиеҕа күрэхтэстэ.

Хамаандаларга булгуччулаах усулуобуйа туруоруллар – бары биир дьиэ кэргэн чилиэннэрэ уонна оҕолорун сааһа 7-тэн 17-гэр диэри буолуохтаах.

Күрэхтэһиилэр «Кросс-выбор» дьиссипилиинэнэн ыытылыннылар. Кыттааччылар, бөлөхтөргө хайдыһан, каартанан көрөн хонтуруолунай пууннары көрдөөтүлэр. Холобур, 10 саастарын туола илик кыргыттар 4 хонтуруолунай пууну булуохтаахтар, 21 саастарыттан үөһээ бөлөххө киирбит аҕалар 20 пууну булар сорудахтаахтар.

Бастакы миэстэҕэ Павловтар дьиэ кэргэттэрэ таҕыстылар, кинилэр үс бөлөх кыайыылаахтара: ыал аҕата – Дмитрий Павлов «М-50» бөлөххө, уоллара – Сергей Павлов  «М-14» уонна кыыстара Катя «Ж-10» бөлөхтөргө.

Иккис миэстэҕэ – Гуляевтар дьиэ кэргэттэрэ: аҕалара – Александр «М-40» бөлөххө – 3-с миэстэ, ийэлэрэ – Виктория «Ж-40» – 1-кы миэстэ, уоллара Слава «М-16» – 2-с миэстэ, кыыстара – Эвелина «Ж-12» бөлөххө – 1-кы миэстэ.

Үһүс миэстэҕэ Сивцевтар дьиэ кэргэттэрэ тигистэ: ыал аҕата – Иван «М-40» – 1-кы миэстэ, ийэлэрэ – Мария  «Ж-40» – 4-с  миэстэ, уоллара – Василий «М-16» – 1-кы миэстэ,  кыыстара Айталина – 8-с миэстэ.