Дьиэҕэ оҥоһуллар анаалыска төһө итэҕэйиэххэ сөбүй?

Социальнай ситимнэргэ кэнники кэмҥэ коронавируска тест рекламата күүскэ баран эрэр. Бу анаалыс төһө кырдьыктаахтык көрдөрөрүн ким да билбэт.

3 №-дээх Өрөспүүбүлүкэтээҕи балыыһа КДЛ ЦКДО сүрүн лаборанын э.т. Нюргуяна Яковлева коронавирус анаалыһын дьиэҕэ оҥорор тест туһунан санаатын тиэрдэр:

- Маннык экспресс-тестары дьиэҕэ тутталларын утарабын. Ханнык баҕарар лабораторнай чинчийии түмүгэ элбэх усулуобуйаттан тутулуктаах –  анаалыс хайдах, ханна хараллыбытыттан, анаалыс оҥоһуллар ньыматыттан.

Медицинэҕэ туттуллар ханнык баҕарар тэрил булгуччу Росздравнадзортан бэриллибит сертификаттаах уонна регистрацияламмытын туһунан дастабырыанньалаах буолуохтаах. Бу докумуоннар тэрил хаачыстыбатын мэктиэлииллэр.

Бу киэҥник рекламаланан эрэр экспресс-тест – иммуноферментнэй анаалыс буолбатах, иммунохроматическай ньыма диэн ааттанар. Хаартыскаҕа уҥа өттүгэр көстөр тест үрдүкү сурааһына тахсыбатах, ол аата сыыһа көрдөрөр диэн. Сыыһа көрдөрөр буолбута тест хараллыбыт усулуобуйатыттан, анаалыс ыытыллыбыт ньыматыттан эбэтэр тест хаачыстыбата куһаҕаныттан буолуон сөп.

Маннык тест М уонна G иммуноглобулиннар баалларын-суохтарын эрэ быһаарар. Оттон организм иммунитетын эппиэтэ киһи уопсай туругуттан быһаччы тутулуктаах. Холобур, коронавирустаабыт киһиэхэ, организм мөлтөөбүт буолан, антитела диэн үөскүү илик буолуон сөп. Оччоҕо тест “отрицательнай” түмүгү таһаарыаҕа.

Маннык тест көмөтүнэн бэрэбиэркэлэнии бары санитарнай нуорманы тутуһууну, бэрчээккэ кэтиини, хаан ылыллар сирин обработкалааһыны ирдиир. Туттуллубут кассета А көрүҥнэээх медицинэ тобохторугар киирэр уонна анал быраабылаларынан хараллыахтаах. Оннук ирдэбиллэри дьиэ усулуобуйатыгар кыайан толоруллубат.

РБ-3 Пресс сулууспата