Дезинфекцияны робот ыытар буолла

Бу күннэргэ киин куорат 26-с №-дээх оскуолатыгар Хотугулуу-Илиҥҥи федеральнай университекка оҥоһуллубут VeDroid робот-дезинфектор үлэтин саҕалаата. Бырайыак ааптара – Арктикатааҕы инновационнай киин резиденэ Николай Потапов.

Модернизированнай роботы 2020 сыл сэтинньитигэр билиһиннэрбиттэрэ. Бу иннинэ кини 1-кы №-дээх поликлиникаҕа, Саха-политехническай лицейгэ, Перинатальнай кииҥҥэ, «Айгуль» атыы-эргиэн киинигэр бэрэбиэркэни ааспыта. Боруобалааһын кэмигэр дезинфектор телеметриянан, хаамыытынан уонна дьоҥҥо дьайыытынан үчүгэй түмүктэри көрдөрбүт.

Оскуола робот-дезинфекторы арыандаҕа ылла. Оҥорон таһаарааччылар 11-с кылаас үөрэнээччилэрин роботы салайарга үөрэттилэр. Онон робот оҕолор аныгы технологиялары баһылыылларыгар кытта көмөлөһүөҕэ.

VeDroid робот бастакыта 2018 сыллаахха дьон көмөтө суох дьиэни сууйарга анаан оҥоһуллубут. 2020 сыл сайыныгар эбии салгыны ыраастыыр рециркулятор олордон биэрбиттэр.