Дельфийскэй оонньууларга Саха сирин ыччата ситиһиилээхтик кытынна

Пермь куоракка Арассыыйатааҕы 20-с төгүлүн ыытыллар Ыччат Дельфийскэй оонньуулара түмүктэннэ. Саха сириттэн манна 6 киһи, ол иһигэр Дьокуускайдааҕы Балет оскуолатын устудьуоннара уонна Намнааҕы педагогическай колледж худуоһунньук кыыһа кытыннылар. 
Култуура министиэристибэтин пресс-сулууспата иһитиннэрбитинэн, Посельскаялар ааттарын сүгэр Балет оскуолатын 1 кууруһун устудьуона Иван Одинцов Дельфийскэй оонньуулар үрүҥ көмүс призера үрдүк ааты ылбыт. 

Кини «Классическай үҥкүү» бөлөххө 15-17 саастаахтар ортолоругар кыттыбыт. Иван Одинцов – Галина Уланова пуондатын стипендиата, хореографическай үҥкүү кыһаларын аан дойдутааҕы күрэхтэрин кыһыл көмүс мэтээлин хаһаайына, KIBС аан дойдутааҕы балет күрэҕин 3-с истиэпэннээх лауреата. 
Дельфийскэй оонньууларга өссө биир Саха сирин  бэрэстэбиитэлэ – Алисия Пак «За артистизм и легкое исполнение” дипломҥа тигистэ. 
Дельфийскэй оонньуулар бырагыраамалара 28 номинациялаах эбит. Манна Арассыыйа 80 регионуттан 2000 кэриҥэ ыччат кыттыбыт.