COVID-19 утары толору дезинфекция ыытыллыаҕа

Өрөспүүбүлүкэ салалтатын уонна Роспотребнадзор Саха сиринээҕи салаатын ыам ыйын 28 күнүгэр туруорбут соруктарыгар олоҕуран, Дьокуускай куорат баһылыга Сардана Авксентьева COVID-19 утары эбии миэрэлэри киллэрэр дьаһалы таһаарда.

Саҥа тахсыбыт дьаһалга тирэҕирэн, сарсыҥҥытан, ыам ыйын 29 күнүттэн саҕалаан, Дьокуускай куорат дьаһалтатын уонна бары муниципальнай тэрилтэлэрин дьиэлэригэр толору дезинфекция ыытыллыаҕа.

Куорат хаһаайыстыбатын эксплуатациялыыр сулууспа оптуобус остонуопкаларын, оҕо балаһааккаларын, тротуардары, элбэх кыбартыыралаах дьиэлэр подъезтарын уонна да атын уопсастыбаннай сирдэри, ол иһигэр Сынньалаҥ уонна култуура пааркатын сирин-уотун дезинфекциялыыр суурадаһынынан обработкалыаҕа. Санатан эттэххэ, бу Куорат хаһаайыстыбатын эксплуатациялыыр сулууспа уопсастыбаннай сирдэри хаһыс да төгүлүн дезинфекциялааһына буолуоҕа.