Чурапчы института үөрэххэ ыҥырар

Н.Н. Тарскай бирииһигэр көҥүл тустууга өрөспүүбүлүкэ бу аҕыйах хонуктааҕыта түмүктэммит чемпионатыгар Чурапчытааҕы физкультура уонна спорт институтуттан 22 бөҕөс кыттыбытыттан 10-на бастакы уонна үһүс миэстэни былдьаһар киирсиилэргэ  туһуннулар. Олор истэригэр атын улуустартан кэлэн институкка үөрэнэ сылдьар устудьуоннар бааллар. Тустууга эрэ буолбакка, физкультура уонна спорт атын көрүҥнэригэр көрдөрүүлэр эмиэ үчүгэйдэр. Арассыыйа уонна Саха Өрөспүүбүлүкэтин өйөбүллэринэн уонна көмөлөрүнэн институт үөрэтэр, олорор базата, материальнай, духуобунай кыаҕа сыллата тупсан, күүһүрэн иһэр. Таас тутуу элбэх. Устудьуоннар аныгылыы, толору хааччыллыылаах дьиэлэргэ үрдүттэн олороллор, үөрэнэллэр. Бу күннэргэ Чурапчытааҕы институкка үөрэххэ киирии докумуоннарын ылыы саҕаланна. Бу туһунан институт ректора Иннокентий Готовцевтыын Тарскай чемпионатыгар кыттыыны ыла кэлбит өрөспүүбүлүкэ сүүмэрдэммит хамаандатын бөҕөстөрө остолобуойга эбиэттии олордохторуна көрсөммүт кэпсэттибит:
– Чурапчы институтугар усулуобуйа барыта тэрилиннэ. Өрөспүүбүлүкэ спорка бэлэмнэнии киинин базатыгар спорт алта көрүҥэр уонна “Модун” спорт национальнай көрүҥнэргэ киинин хайысхаларынан анал тренердэр дьарыктыыллар. Үөрэххэ киирбит ыччаттар бэйэлэрэ сөбүлүүр көрүҥнэринэн дьарыктаныахтарын сөп. Толору хааччыллыылаах уопсай дьиэҕэ олороллор, сүүмэрдэммит хамаандаларга киирбиттэр босхо аһыыллар, кэккэлэһэ турар куорпуска үөрэнэллэр. Ону таһынан, көннөрү истипиэндьийэни сэргэ, үчүгэйдик үөрэнэр, уопсастыбаннай үлэҕэ көхтөөх, науканан дьарыктанар устудьуоннарга үрдэтиллибит истипиэндьийэ баар.

Билигин 374 устудьуон алта хайысханан иһиттэн уонна кэтэхтэн үөрэнэллэр. Олимпийскай эрэл училищетын филиалыгар орто анал үөрэххэ эмиэ үөрэнэллэр. Холобура, улахан спортсменнар БКЭ-ни кыайан туттарбатахтарына, бу училищеҕа киирэн үс сыл үөрэниэхтэрин сөп. Ол кэнниттэн институкка быһалыы 2-ис кууруска киирэр кыахтаахтар. Манна физкультура, ОБЖ учууталын, тренер-преподаватель, спортивнай психолог о.д.а. хайысхаларынан идэлэри баһылыахтарын сөп. 
Саҥа ылыллыбыт РФ үөрэҕин концепциятыгар олоҕуран, быйылгыттан уопсай үөрэхтээһин оскуолаларыгар спортивнай кулууптар аһыллан үлэлиэхтээхтэр, онно 1500 исписэлиис, преподавателлэр, тренердэр наадалар. Билигин институт үлэтэ онно каадыры бэлэмнээһиҥҥэ туһаайыллар. 
Институту бүтэрбиттэри кытта сибээс тутуһуллар. Идэни уларытар, таһымы үрдэтэр куурустар бааллар. “Спорт – норма жизни” судаарыстыбаннай бырагыраама көмүскэнэн, дойду 38 регионугар үөрэтии буолла. Мас тардыһыытыгар уонна спорт алта национальнай көрүҥэр идэни үрдэтии куурустарын аастылар. 

Атын регионнар Чурапчы институтун үлэтин үрдүктүк сыаналыыллар. Чурапчыга олорор-үлэлиир преподавателлэр эрэ буолбакка, М.К. Аммосов аатынан ХИФУ, киин үрдүк үөрэх кыһаларын исписэлиистэрэ, учуонайдара кэлэн лекциялары ааҕаллар. Үөрэтии отчуота үрдүк таһымҥа ааста. Кытайы, Монголияны, Тываны, Бурятияны кытта дуогабар түһэрсилиннэ. Чурапчы институтун выпускниктара бэйэлэрин дойдуларыгар спорду салайаллар, тренердииллэр. Тиийдэххэ, спортсменнарбытын үөрэ-көтө көрсөллөр, хардарыта көмөлөсүһүү быыстала суох оҥоһуллар. Ыччаттарын Чурапчы институтугар ыытарга бэлэмнэр, – диэн кэпсээтэ ректор Иннокентий Готовцев.
Арассыыйа тыатын сиригэр соҕотох үрдүк үөрэх кыһатыгар – Чурапчытааҕы судаарыстыбаннай физкультура уонна спорт федеральнай суолталаах институтугар кэлэн үөрэниҥ!