Чурапчы-Дьокуускай хайысханан оптуобус сылдьыаҕа

Чурапчы улууһун олохтоохторо Чурапчы-Дьокуускай- Чурапчы хайысханан оптуобуһунан айанныыр кыахтаннылар. Саҥа маршрут быйыл сайыҥҥыттан саҕаланара былааннанар диэн СӨ баһылыгын уонна бырабыыталыстыбатын пресс-сулууспата иһитиннэрдэ.  

Итинник сорудаҕы, улууска бырабыыталыстыба отчуотун кэмигэр, регионнааҕы Тырааныспар уонна суол хаһаайыстыбатын министиэристибэтигэр уонна улуус салалтатыгар СӨ бырабыыталыстыбатын бэрэссэдээтэлэ Андрей Тарасенко биэрдэ.

Оптуобус күн аайы сылдьара былааннанар, билиэт сыаната барыллаан 500 солкуобай буолуоҕа, ити такси сыанатыттан үс төгүл кыра.

Маршрут Аллараа Бэстээҕинэн ааһыаҕа, уопсай уһуна – 176 км.

Тырааныспар уонна суол хаһаайыстыбатын миниистирэ Владимир Сивцев иһитиннэрбитинэн, бу иннинэ «Дьокуускай –Аллараа Бэстээх – Чурапчы – Дьокуускай» хайысханан айан куттал суоһаабатыгар сыһыаннаах чинчийиини ааспыт. Маршрут куттал суох буолуутун ирдэбиллэригэр эппиэттиир, ол эрэн сырыыны саҕалыырга оптуобус тохтобулларын туруоруу ирдэнэр, ол иһигэр киирэр «хармаан», сатыы дьон туоруур сирэ уонна сырдатыы баар буолуохтаах.

Андрей Тарасенко туһааннаах министиэристибэҕэ уонна Чурапчы улууһун салалтатыгар саҥа маршруту саҕалыырга бэлэмнэнэргэ уонна наадалаах инфраструктураны оҥорорго сорудахтаата.