11.02.2021 | 10:19

Чаҕылҕанныы элэҥнэстэр

Чаҕылҕанныы  элэҥнэстэр
Ааптар: Киин Куорат

Монитордарга спортсменнар чыпчаххайынан охсордуу иэмэх талахтыы сылбырҕа түргэн  хамсаныыларыттан  онно сото сус гынар, манна атах адаарыйар, итиннэ илии элэҥниир. Ааспыт өрөбүллэргэ хас да онлайн түһүлгэ араас ханаалларынан тэҥҥэ быһа бэрилиннэ. Онон тв, көмпүүтэр аттыгар төлөпүөн тутан олорон, хас да ханаалга тэҥҥэ кэлэ турар быһа биэриилэртэн ханна тыас тахсар, хаһыы иһиллэр –  ол диэки эргиллэбин.

Охсор-тэбэр тыас тип-тиҥиргэс 

Экраҥҥа киин куораппыт биир мааны дыбарыаһын “Кыайыы 50 сыла” саалатыттан кик-боксингтан биэрии рингэҕэ тип-тибигирэс тыас буолбутугар онно хайыстым. Мааҕыын итиннэ кыра соҕус саха кыыһа бэйэтиттэн өндөс утарсааччытын үөс-батааска биэрбэтэҕэ. Буукка тэбээт, чугаһаан киирбитэ уонна рингэҕэ анньан туран бокуойа суох уҥа-хаҥас илиитинэн биэртэлээн силлиргэппитэ. Тэйсии кэннэ хаста да күүстээх утары охсуунан төбөҕө доргуппута. Онтон бииригэр утарсааччыта дөйөн нокдаун аахтарбыта.

Сотору ити комбинациялары хаста да хатылаабыта. Эмиэ тиҥиргэтэн эрэр. Тиһэҕэр быһа кыайыы! Бу Алина Плотникова  “К-1” кытаанах көрүҥҥэ ССРС-тан кик-боксиҥҥа бастакынан аан дойду чемпиона буолан саханы аатырдыбыт Александр Иванов кэриэһигэр Уһук Илин ФО 15-16 саастаах кыргыттарга 56 кг чемпиона буолла.

Манна оҕолорго, эдэрдэргэ уонна улахан дьоҥҥо биэс регионтан 136 кикбоксер рингэҕэ холлорунан холостулар, атахтарынан аахсыстылар.  Кинилэртэн аҥаардарын кэриэтэ: Саха сириттэн – 66.

71 кг аан дойдутааҕы таһымнаах маастар Денис Андреев араас албастары көрдөрдө. Кини сааһа – 26, Арассыыйа уонна Европа (2014, 2016 сс.) иккилии төгүллээх чемпиона. Соторутааҕыта Уһук Илин сүрүн тренеринэн анаммыт Андрей Васильевич Алексеев салалтатынан эрчиллэр.

Приморскай кыраай кэлин сылларга уокурукка лидер. Кинилэр кустук курдук куоһанан, охтуу оҥостон ыалдьыттартан саамай элбэх – 35 спортсменнаах кэлбиттэр. Биир күүстээхтэрэ Никита Юшков полуфиналга балайда хорсуннук киирсэ сатаата. Ол эрээри үһүс эргииргэ Денис эргийэ түһэн баран, ат тэбэрин курдук уҥа атаҕынан төбөҕө “ыалдьыттатыыттан” тиэрэ таһылла түстэ. Нокаутунан быһа кыайыы ааҕылынна.

Финалга Андреев Амур атамаанын Андрей Елины эмиэ икки бастакы үстүү мүнүүтэлэргэ дьиҥ хаһаайынныы баһыйа сылдьыбыта. Үһүс түһүмэххэ өрө ыстанан иннигэр иккилии тэбиилэринэн субурутан ойуччу ордугун бигэргэттэ. Өссө биир санаанан “Турнир бастыҥынан” талыллан, Ньурба улууһун администрациятыттан уонна А.Иванов аймахтарыттан  сүрүн анал бирииһинэн наҕараадаланна.

Саха сириттэн улахан дьоҥҥо кыһыл көмүс мэтээллэри кэттилэр:  

Михаил Слепцов (51 кг), 

Петр Васильев (54), 

Эрдэм Моролдоев (57),

Руслан Проскурин (60), 

Денис Андреев  (71),

Люция Корнилова (48), 

Юлия Петрова (56).

Итини таһынан 7 үрүҥ көмүс, 8 боруонса мэтээллэри хаалларан муус устарга Дьокуускайга ыытыллар Арассыыйа чемпионатыгар 22 путевканы ыллыбыт. Оҕолорбут, ыччаттарбыт эмиэ пьедестал 1,2,3 үрдэллэригэр тахсан, үксүлэрэ маннык түһүлгэҕэ бастакы дабайыыларын оҥордулар.

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.