Быйылгы «Үлэ киһитэ» бириэмийэ лауреаттарын муус устар 30 күнүгэр билиэхпит

2023 сылга биллэриллиибит Үлэ сылыгар Ил Дархан Айсен Николаев 300 тыһ. солк. кээмэйдээх харчынан бириэмийэлээх «Үлэ киһитэ» диэн саҥа бириэмийэни олохтообута. 
Бу бириэмийэ мантан ыла өрөспүүбүлүкэ 50 бастыҥ үлэһитигэр сыл аайы туттарыллар. Быйылгы лауреаттары наҕараадалааһын муус устар 30 күнүгэр күүтүллэр. 
«Үлэ киһитэ» бириэмийэҕэ былырыын 300-чэкэ сайаапка киирбитэ биллэр. Оттон кыайыылаахтар ортолоругар слесарь, токарь идэлээхтэр, тимир, мас уустара, тыа хаһаайыстыбатын, промышленнас исписэлиистэрэ, учууталлар, доруобуйа харыстабылын эйгэтин бэрэстэбиитэллэрэ, култуура үлэһиттэрэ – өрөспүүбүлүкэбит сайдарын, туруктаах буоларын туһугар күннэтэ сыралаһар бастыҥ үлэһиттэр бааллара.
Бэлиэтээн эттэххэ, кыайыылаахтары сүүмэрдээһин үс түһүмэҕинэн ыытыллар, быйыл 50 бастыҥ үлэһити 221 сайаапкаттан таллылар, диэн иһитиннэрэр Ил Дархан уонна Бырабыыталыстыба пресс-сулууспата.