Быйылгы бырааһынньык – Улуу Кыайыы 80 сылыгар генеральнай эрэпэтииссийэ

Өрөспүүбүлүкэ Бырабыыталыстыбатын бэрэссэдээтэлин солбуйааччы Георгий Степанов салалтатынан буолан ааспыт «Кыайыы» өрөспүүбүлүкэтээҕи кэмитиэт мунньаҕар вице-премьер быйылгы бырааһынньык 2025 сылга бэлиэтэнэр Улуу Кыайыы 80 сыллаах үбүлүөйүн генеральнай эрэпэтииссийэтэ диэн бэлиэтээтэ.

Бүгүҥҥү күҥҥэ Саха сиригэр икки тыһыынча кэриҥэ Аҕа дойду Улуу сэриитин бэтэрээнэ олорор (сэрии кыттыылаахтара, тыыл бэтэрээннэрэ, блокада сиэртибэлэрэ о.д.а.), ол иһигэр сэрии кыттыылаахтара – 13; оттон сэрии сылларын оҕолоро статустаах дьон ахсаана – 12 261.
«Улуу Кыайыы 80 сыллаах үбүлүөйүн киэҥ далааһыннаахтык ыытыахтаахпыт. Аҕа көлүөнэ дьоммут дьоруойдуу холобурун көлүөнэттэн көлүөнэҕэ тиэрдэр эбээһинэстээхпит», – диэтэ Георгий Степанов.
Үлэ уонна социальнай сайдыы миниистирэ Елена Волкова иһитиннэрбитинэн, эһиил, 2025 сылга, Аҕа дойду Улуу сэриитин кыттыылаахтарыгар биир кэмнээх төлөбүр кээмэйдэрэ икки бүк үрдүүрэ, чуолаан биэс тыһыынчаттан саҕалаан, 100 тыһыынчаҕа тиийэрэ күүтүллэр.
Маны сэргэ дойду баһылыга Вдадимир Путин Кыайыы 80 сылын бэлиэтээһиҥҥэ аналлаах ыйааҕынан Улуу Кыайыыны түстээбит бөдөҥ кыргыһыыларга аналлаах киэҥ хабааннаах тэрээһиннэри ыытыы чэрчитинэн Ил Дархан Айсен Николаев ыччаты патриоттуу тыыҥҥа иитэр сыалтан Саха сирин байыастара сэриилэспит дойдуларынан, ол иһигэр Белоруссиянан, Монголиянан уонна Кытайынан туристыыр маршруттары былаанныыллар. 
Оттон быйыл Улуу Кыайыы 79 сылын бэлиэтиир тэрээһиннэр чэрчилэринэн үгэс буолбут «Георгиевскай лиэнтэ», «Тиэргэнинэн ыллыыбыт», «Өйдөбүнньүк чүмэчитэ», «Дьиэ кэргэмминэн киэн туттабын», «Кыайыы түннүктэрэ» аахсыйалар, тематическай кылаас чаастара, эр санаа уруоктара, мемориалларга сибэкки дьөрбөтүн ууруу ыытыллыахтара, диэн иһитиннэрэр Ил Дархан уонна Бырабыыталыстыба пресс-сулууспата.