Быйылгы былаан – 4 эбийиэк

Николай Анатольевич Ксенофонтов, Марха микрооройуонун дьаһалтатын салайааччыта:

–“Куттала суох уонна хаачыстыбалаах айан суоллара” национальнай бырайыагынан Экспериментальнай, Яков Петерс, Школьнай, Газовиктар уулуссалара өрөмүөннэммитэ. Ону сэргэ, Севернай микрооройуоҥҥа 6, 5 км суол тутуллубута.

Аччыгый Мархаҕа, Севернай микрооройуоҥҥа Мархинка үрэҕи туоруур муоста тутуллубута. Олохтоохтор өр күүппүттэрэ олоххо киирэн, үөрүүбүт үгүс.

Быйылгы былаан киэҥ, түөрт эбийиэккэ күргүөмнээх үлэ күүтүллэр. Центральнай, Олег Кошевой, Интернациональнай (эбии киирбитэ), Заводской уулуссалар оҥоһуллуохтаахтар.    

“Сырдык киин куорат” бырагырааманан уонна “Куттала суох уонна хаачыстыбалаах айан суоллара” национальнай бырайыагынан Севернай микрооройуоҥҥа сырдатыы үлэтэ ыытыллыахтаах. “Сырдык киин куорат” бырагырааманан эбии үп көрүллүөхтээх. Онно ханнык эбийиэктэр киирэллэрэ билигин биллибэт, сүүмэрдээһин буолар.

Куорат таһынааҕы нэһилиэктэр ортолоругар суол өрөмүөнүгэр инники күөҥҥэ сылдьабыт. Былааммытын 34 бырыһыан куоһарбыппыт.

Хапытаалынай өрөмүөн пуондатын нөҥүө элбэх кыбартыыралаах дьиэлэргэ өрөмүөн үлэтэ ыытыллыахтаах. “Газпром – оҕолорго” бырагыраама чэрчитинэн бассейннаах, катоктаах спортивнай эбийиэк тутуллуохтаах.