Быйыл өрөспүүбүлүкэҕэ 17 оскуола үлэҕэ киириэҕэ

«2023 сылга 20 эбийиэк үлэҕэ киириэҕэ — 17 оскуола, Хатаска уонна Дьокуускайга үс оскуолаҕа салҕааһын тутуу оҥоһуллуоҕа. Барыта 4 875 миэстэ тахсыахтаах. Оскуолалар Саха сирин араас муннуктарыгар, ол иһигэр ыраах уонна арктическай оройуоннарга баар буолуохтара», — диэн иһитиннэрэллэр Үөрэҕирии министиэристибэтигэр.

Тутууну федеральнай, регионнааҕы уонна бүддьүөт таһынан үп, итиэннэ  өрөспүүбүлүкэ инвестиционнай бырагыраамата үбүлүүр. Ол курдук, «Үөрэҕирии» национальнай бырайыак, «Тыа сирин биир кэлим сайдыыта»  бырагыраама уонна муниципальнай-чааһынай партнерство механизма үлэлиир.

Саамай элбэх миэстэлээх оскуола Дьокуускайга ДСК дьоҕус оройуонугар аһыллыаҕа — 990 миэстэлээх. Итини таһынан, Пирогов уулуссатыгар 180 миэстэлээх анал оскуола үлэҕэ киириэҕэ. 2021 сыллаахха ойуур баһаарыттан эмсэҕэлээбит Бэс Күөлэ сэлиэнньэтигэр 150 миэстэлээх оскуола үлэлиэҕэ.

2022 сылга өрөспүүбүлүкэ үрдүнэн 3,7 тыһ миэстэлээх 14 оскуола үлэҕэ киириэҕэ.  Саха сирин оскуолаларыгар барыта 152,1 тыһыынча оҕо үөрэнэр.