Быйыл Арассыыйаҕа тыа хаһаайыстыбатын микробиэрэпиһэ ыытыллыа

РФ Бырабыыталыстыбатын 2020 сыл атырдьах ыйын 29 күнүнээҕи 1315 №-дээх Уурааҕар олоҕуран, 2021 сыл атырдьах ыйын 1 күнүттэн 30 күнүгэр диэри РФ территориятыгар  тыа хаһаайыстыбатын микробиэрэпиһэ ыытыллар.  
Маннык улахан хабааннаах тэрээһин 2005 сыл от ыйын 21 күнүнээҕи 108-ФЗ  №-дээх «Бүтүн арассыыйатааҕы тыа хаһаайыстыбатын биэрэпиһин туһунан» Федеральнай сокуонугар олоҕуран биэс сылга биирдэ ыытыллар. 
Тыа хаһаайыстыбатын микробиэрэпиһин ыытыы сыала – улахан биэрэпис  ыытылларын икки ардыгар, сайдыыга прогнозтааһыны уонна экэниэмикэ  өттүттэн миэрэлэри ыларга, тыа хаһаайыстыбатын оҥорон таһаарар эйгэтин үлэтин таһымын үрдэтэргэ, тыа хаһаайыстыбатыгар буола турар уларыйыылар туһунан информацияны хомуйуу буолар. 
2021 сыллааҕы тыа хаһаайыстыбатын микробиэрэпиһин уратыта – респонденнартан информацияны хомуйуу аныгы технологиялар көмөлөрүнэн ыытыллар. Ол курдук планшетнай компьютердар туттуллуохтара. Ити информация хаачыстыбатын, хомуйарга тэтимин уонна дааннайдары кытта үлэ таһымын үрдэтиэҕэ. 
Саха сиригэр микробиэрэпискэ 628 тыа хаһаайыстыбатын тэрилтэлэрэ, 3222 бааһынай (фермерскэй) хаһаайыстыбалара уонна биирдиилээн предпринимателлэр,  61345 кэтэх хаһаайыстыбалар, 314 коммерческайа суох гражданнар холбоһуктара кыттыахтара. 
Тыа хаһаайыстыбатын тэрилтэлэригэр, бааһынай (фермерскэй) хаһаайыстыбаларга,  коммерческайа суох холбоһуктарга микробиэрэпис бары муниципальнай оройуоннарга биир тэҥ ньыманан ыытыллыаҕа. Кэтэх хаһаайыстыбаларга биэрэпис талан ылар ньыманан барыаҕа, онно 16 муниципальнай  оройуон киирэр: Амма, Үөһээ Бүлүү, Бүлүү, Горнай, Ленскэй, Мэҥэ-Хаҥалас, Мирнэй, Нам, Ньурба, Өлүөхүмэ, Сунтаар, Таатта, Хаҥалас, Уус-Алдан, Уус-Майа, Чурапчы уонна Дьокуускай куорат уокуругугар киирсэр нэһилиэнньэлээх пууннар. 
Микробиэрэпис – 2026 сылга ыытыллар Бүтүн арассыыйатааҕы  тыа хаһаайыстыбатын  биэрэпиһигэр бэлэмнэнии. 
Барыллаан түмүк 2021 сыл IV кыбартаалыгар, оттон түмүк – 2021 сыл кыбартаалыгар тахсыахтара.