20.05.2020 | 17:38

Быйыл 23 км суол оҥоһуллуоҕа

Быйыл 23 км суол оҥоһуллуоҕа
Ааптар: Киин Куорат
Бөлөххө киир

“Россия 24” ханаал быһа эфиригэр Дьокуускай баһылыгын солуйааччы Евгений Григорьев таҕыста. Территориялары сайыннарыы боппуруостарыгар баһылык солбуйааччыта “Куттала суох уонна хаачыстыбалаах суол” национальнай бырагыраама Дьокуускай куоракка хайдах олоххо киирэрин, ону таһынан ханнык эбийиэктэргэ хапытаалынай өрөмүөн барарын, суол  тутуутун туһунан сиһилии кэпсээтэ.

“Куттала суох уонна хаачыстыбалаах суол” национальнай бырайыакка Дьокуускай куорат 2019 сыллаахха киирбитэ. Быйыл 23 км 560 м суол өрөмүөннэнэр. Барыта 28 уулусса, ол иһигэр 14 уулусса куорат таһынааҕы нэһилиэктэргэ – Кангалас, Маҕан, Тулагы, Табаҕа, Хатас суоллара.

 “Куорат кытыы сирдэригэр болҕомто хайаан да ууруллуохтаах. Саҥа суоллар нэһилиэккэ сайдыыны түстүөхтэрэ диэн эрэнэбит”, - диэтэ Евгений Григорьев. 28 уулусса өрөмүөнүн аукциона барыта ыытылынна. Үлэҕэ график быһытынан тахсыы саҕаланна.

Национальнай бырайыак чэрчитинэн, ааспыт нэдиэлэттэн Губин, Кеша Алексеев, Три Сосны уулуссаларга өрөмүөн саҕаланна.

Быйыл киин уулуссалар өрөмүөннэрэ суоллар быһа охсуһар сирдэриттэн барар. Ол курдук, кэлэр нэдиэлэттэн Поярков уонна П.Алексеев, Поярков уонна Курашов уулуссаларын быһа охсуһууларыгар үлэ саҕаланыаҕа. Баларга суол саахала элбэхтик тахсарын бары билэбит, өрөмүөн кэннэ саахал тахсар куттала барыта туоратыллыахтаах.

Ленин проспегын өрөмүөнэ – туспа улахан бырайыак. Краснояров уулуссатыттан саҕалаан, Хабаров уулуссатыгар диэри, ол аата проспект бүтүннүү оҥоһуллуохтаах. 2021-2022 сыллар былааннарыгар киирбит үлэҕэ суол бүрүөһүнэ эрэ буолбакка, кытыытынааҕы тутуулары кытта таарыйар баараҕай үлэлэр ыытыллыахтара. Евгений Григорьев кэпсииринэн, Ленин проспегын өрөмүөнүн уустугурдар суолунан проспект аннынан Водоканал коллектора ааһара буолар. 1960 сыллаахха тардыллыаҕыттан биирдэ да өрөмүөннэнэ илик. Онон коллектор эмиэ сөргүтүллүөхтээх. 2021-2022 сылларга Ленин проспега өрөмүөннэнэн бүтүөхтээх. Билигин үлэ бырайыагын бэлэмнииргэ куонкурус биллэрилиннэ.

 Быһа эфир кэмигэр куорат олохтоохторо 2019 сыллаахха өрөмүөннэммит суоллар кэтиттэрин туһунан ыйытыылары биэрдилэр.  Евгений Григорьев быһаарбытынан, суоллар кэтиттэрэ судаарыстыбаннай стандартарга эппиэттиир, бырайыактыыр докумуон барыта судаарыстыбаннай экспертизэни ааһар.

Маны тэҥэ куорат олохтоохторун национальнай бырайыак чэрчитинэн ыытыллар суол өрөмүөнүн хаачыстыбата долгутар. Евгений Григорьев хаачыстыбаны хайдах хонтуруоллуулларын кэпсээтэ: “Биһиги Чайковскай уулуссаны туттубут, Ларионов, Пилоттар уулуссаларыгар, Хатыҥ Үрэх шоссетыгар кэккэ боппуруостар үөскээтилэр. Бэдэрээччиктэр үлэлэрин туппатыбыт, эбээһинэстэрин толороллоругар ирдэбил түһэрдибит”. Маны таһынан, баһылык солбуйааччыта суол оҥоһуутун хаачыстыбатын кэтээн көрөр, хонтуруоллуурга көмө буолар көхтөөх гражданнарга махтанна.

Национальнай бырайыак 5 сыл устата олоххо киирэр, 2019-2024 сыллар устата 203,5 км суол тупсарыллыахтаах, ол Дьокуускай суолун 85 бырыһыана.

***

Быйыл Дьокуускайга 23,5 км асфальт суол тэлгэниэхтээҕин туһунан баһылык Сардаана Авксентьева инстаграм страницатыгар суруйбута.

“Суол тутуута, өрөмүөнэ барыта олохтоох бүддьүөттэн үбүлэнэр, ол аата эһиги биһикки харчыбытыгар, ол иһин бэдэрээччиктэртэн үрдүк хаачыстыбалаах үлэни ирдиибит”, — диэн баһылык тоһоҕолоон суруйар.

Быйыл суол тутуутугар техническэй уонна уопсастыбаннай хонтуруол күүһүрүөҕэ. Суол тутуутун боппуруостарын быһаарсар мунньах Ютубка тахсыбытын элбэх дьон көрбүтүнэн сабаҕалаатахха, олохтоохтору бу боппуруос дьиҥнээхтии долгутар.

Сонуннар

Ордук ааҕаллар

Дрону күрдьэҕинэн суулларбыт саха буойуна
Дьон | 16.05.2024 | 14:00
Дрону күрдьэҕинэн суулларбыт саха буойуна
Нэдиэлэ аайы саҥаттан саҥа киһини билсэр, салгыы кинини кытта сибээһи тутар, суруйсар суруналыыс идэлээх киһи үлэтин биир эмиэ интэриэһинэй өрүтэ. Мин анал байыаннай дьайыыга сылдьар суруйбут, ааҕааччы киэҥ эйгэтигэр таһаарбыт уолаттарбын үгүстэрин билсэбин, ыйыталаһабын, ханна тиийбиттэрин, сылдьалларын сураһабын, хомойуох иһин, сорохторун сүтэрэбин...   Хачыгаардыы сылдьан бэбиэскэ туппутум Анал байыаннай дьайыыга мобилизация...
Татьяна Иванова:  «Дьол уйатын ытыктабыллаах сыһыан эрэ тутар»
Дьон | 16.05.2024 | 16:00
Татьяна Иванова: «Дьол уйатын ытыктабыллаах сыһыан эрэ тутар»
Арассыыйаҕа Дьиэ кэргэн сылынан уонна Дьиэ кэргэн аан дойдутааҕы күнүгэр сөп түбэһиннэрэн, таптал кыымыттан саҕыллан биэс уон биэс сыл бииргэ олоруу дьолун билбит Татьяна, Петр Ивановтар дьиэ кэргэн туһунан сырдатабын.   Киһи төрүүрүгэр олоҕо барыта үөһэттэн суруллан кэлэр ыйаахтаах, ол  сиэринэн оҕо, ыччат буола үүнэн, сирдээҕи тапталы көрсөн, ийэ, аҕа дьолун...
Дархан этээччи Валентин Хорунов:  «Саха оһуохайа аан дойду дьонун түмүөҕэ...»
Дьон | 23.05.2024 | 10:00
Дархан этээччи Валентин Хорунов: «Саха оһуохайа аан дойду дьонун түмүөҕэ...»
Былырыын балаҕан ыйын 7 күнүгэр Саха Өрөспүүбүлүкэтин Ил Дархана Айсен Николаев Оһуохай күнүн олохтуур туһунан Ыйаахха илии баттаабыта. Дьэ, ол үөрүүлээх күммүт – ыам ыйын 25 күнэ үүнэрэ икки хонук хаалла.  Бүгүҥҥү нүөмэрбит ытык-мааны ыалдьыта – Саха Өрөспүүбүлүкэтин Дархан этээччитэ Валентин Хорунов.   Дьуохар биһигэр улааппыт дьоллоохпун – Валентин Васильевич, саха...
Оҕуруотчут кистэлэҥнэрэ
Тускар туһан | 23.05.2024 | 18:00
Оҕуруотчут кистэлэҥнэрэ
Кылгас, ол эрээри өҥүрүк куйаас сайыннаах Сахабыт сиригэр эгэлгэ сибэккилэри, оҕуруот аһын арааһын үүннэрэн ылабыт. Сылтан сыл аайы соҕуруу дойдуга силигилии үүнэр сонун үүнээйилэр көрүҥнэрин олордон,  тиэргэммит, дьиэбит  кэрэ көстүүлэнэр, ону тэҥэ оҕуруот аһыттан, отонноох талахтартан кэнсиэрбэлэри, хомпуоттары оҥосторбут элбээтэ.    Бастыҥ тиэргэннээх  хаһаайка Мин бүгүн сайыҥҥы сырал күннэргэ ис сүрэхтэн...