Быыбардыыр учаастактарга СOVID-19 инфекциятыттан харыстанар миэрэ тутуһуллар

Быыбар бары учаастактарыгар коронавирус инфекциятыттан харыстанар миэрэ барыта тутуһуллар. Ол туһунан брифиҥҥэ суһал штаб  аатыттан өрөспүүбүлүкэ вице-премьера Ольга Балабкина иһитиннэрдэ.  
«Бу күннэргэ, балаҕан ыйын 17-19 күннэригэр, быыбарга баран куоластыыбыт. Өрөспүүбүлүкэ суһал штаба территориальнай быыбар хамыыһыйаларын кытта миэстэтигэр, учаастактарга, куттал суох буолуутун хааччыйар бары миэрэлэри киллэрдибит. Бэйэм сарсыардаттан кэккэ учаастактарга сылдьан нуорманы тутуһаллар эбит диэн көрдүм. Барыгытын сэрэтэр миэрэлэри тутуһаргытыгар ыҥырабын», — диэтэ Ольга Балабкина.
«Амбулаторнай ыарыһахтары уонна изоляцияҕа олорон анаалыстарын түмүгүн кэтэһэр, эбэтэр хантаактаах дьону үс күн иһигэр сайабылыанньанан учаастактааҕы быыбар хамыыһыйатын бэрэстэбиитэлэ куоластатыаҕа. Конституциянан көрүллүбүт быраап толору туһаныллыаҕа», — диэн эбэн эттэ кини.
Санатан эттэххэ, бүгүн сарсыарда 8 чааска Саха сирин бары быыбардыыр учаастактара үлэлэрин саҕалаатылар. Быыбар үс күн — балаҕан ыйын 17, 18, 19 күннэригэр ыытыллыаҕа. Саха сирин олохтоохторо РФ Судаарыстыбаннай Думатын депутаттарын, итини сэргэ сорох улуустарга оройуон, нэһилиэк баһылыктарын уонна оройуон сэбиэтин, бэрэстэбиитэллээх уорганнарын депутаттарын талыахтара