Быыбардар чугаһаатылар

Аны күһүн өрөспүүбүлүкэбит Ил Дарханын, Ил Түмэн уонна Дьокуускай куорат Дууматын саҥа састааптарын, 9 улуус баһылыгын, 22 оройуон Сэбиэттэрин дьокутааттарын, нэһилиэктэр баһылыктарын о.д.а. аны кэлэр биэс сылга талыахпыт.

Онон улахан быыбарга бэлэмнэнии бара турар. Ол курдук, барыллаан куоластааһын диэн «Биир ньыгыл Арассыыйа» баартыйа иһинэн тэриллэр быыбар иннинээҕи куоластааһын буолуохтаах.

Барыллаан куоластааһын ыам ыйын 22-28 күннэригэр ыытыллыахтаах. Дьон-сэргэ pg.er.ru саайтка киирэн, «Госуслуги» портал нөҥүө онлайн куоластыыр.

Хандьыдааттары регистрациялааһын кулун тутар 8 күнүттэн саҕалаан, муус устар 27 күнүгэр диэри бара турар.

Билиҥҥитэ өрөспүүбүлүкэ үрдүнэн сүүстэн тахса хандьыдаат регистрацияланан, Ил Түмэҥҥэ уонна киин куорат Дууматыгар сайабылыанньатын биэрбит. Санатан эттэххэ, Ил Түмэҥҥэ 70 дьокутаат талыллыахтаах.